eL trAsgU d´aRecEs

Domingo, 19 de febrero de 2006

LA TV ASTURIANA Y LA FALTA DE DEMOCRACIA N´ASTURIES

La televisión pública asturiana lleva cuasi dos meses en periodu de prebes y tovía nun sabemos un res de la presencia que se-y va dar a la nuesa llingua. Pel momentu´l direutor del ente yá dio nuncia nun alderique que pal próximu 4 de Marzu la TPA entamara emitir fútbol de primera, incumpliendo otra vegada lo que dixera nel so discursu de toma de posesión de la dirección de la RTPA, aú falo d´una tv barata ensin fútbol de primera, amás de dicir que l´autonómica normalizaría l´asturianu. Polo menos dionos una bona nueva, Ornia anunció que se taba preparando una especie de Lunnis o Barrio Sésamo con personaxes de la mitoloxía asturiana, el títulu que baraxan pal programa ye `Presta a esgaya´, supongo que con esi títulu el progrma infantil sedrá n´asturianu.

Pel momentu Perez Ornia acaba de ser agraciáu col “Madreñazu” de la Xunta pola defensa de la llingua, el premiu negativu que concede ca añu la Xunta nos sos premios Andrés Solar. Según la organización el direutor del ente público ye'l responsable últimu de la marxinación del asturianu na TPA. El “Pegollu”, el premiu positivu, foi parar a les manes de la empresa informativa Araz Net S.L., editora d´Asturies.com pola so contribución a favor del usu y espardimientu de la llingua asturiana. Los premios foron entregaos el pasáu 27 de xineru nel Antiguu Institutu de Xixón.

Pero la llabor de la Xunta pa esixir una televisión que respete l´asturianu y que cumpla la propia llegalidá vixente, sinón hai presencia del asturianu la tv taría incumpliendo´l propio Estatutu, nun acaba na entrega d´estos premios. La Xunta va entamar una fuerte campaña pa denunciar la marxinación del asturianu na televisión pública. Pa eso ficieron una bona cantidá de pegadielles. La campaña ta protagonizada pol presidente del Principáu y xuega col llema de la RTPA, Reflejo de ti, pa convertilu nel “Reflexu de Tini”. Nun ye la primer vagada que la Xunta fai una campaña asina. Cuando s´anunció la creación del ente públicu la Xunta recoyó más de 20.000 firmes pa esixir una tv 100 % n´asturianu.

El pasáu 15 de Xineru la Xunta llevo a cabo la so campaña nel estadiu Nuevo Carlos Tartiere d´Uviéu nel partíu qu'enfrentó a los uvieinos col Real Unión. La Xunta desplego una pancarta de más de 15 metros onde se lleía “la televisión asturiana na llingua asturiana” que pudieron ver tolos espectadores de la tv asturiana al tar asitiada la pancarta detrás d´una portería. Pero nun-y lo van poner fácil a la Xunta pa llograr el so llabor que yá sabemos que n´Asturies nun hai democrática. Amuesa de la falta de democracia ye qu´a la selmana siguiente a miembros de la Xunta nun se-yos permitió entrar nel estadiu con pancartes, daqué asemeyáu nun creyó que pasara enxamás na historia de la democracia nel Estáu español, ¿cuándo se prohibió a dalguién entrar nun partíu con una pancarta fuese de lu que fuere?, pero como somos asturianos yá tamos avezaos a que nos traten como seres inferiores con menos drechos que´l restu naciones del estáu español. Perdón… dixi nación, quixi dicir rexón, a ver si vamos ser igual que los catalanes…

Por: eL trAsgU d´aRecEs | TeleTini | Comentarios (0) | Referencias (0)