eL trAsgU d´aRecEs

Jueves, 23 de febrero de 2006

LA RTPA PRESIONA´L REAL UVIÉU PA QUE RETIRE LES PANCARTES QUE PIDEN UNA RTPA N´ASTURIANU

José Ramón Pérez Ornia foi nomáu Direutor xeneral del Ente Públicu de Comunicación del Principáu d´Asturies pol Conseyu de Gobiernu el 19 de xineru de 2005.

La organización de defensa del idioma Xunta pola Defensa de la Llingua sigui cola so campaña pa esixir una televisión asturiana n´asturianu, pero toparon con un gran escayu; la dirección de la RTPA nun quier qu'eses pancartes seyan vistes pol públicu de l´asturiana, que sinón como diba tener Areces el focicu de dicir que nun hai demanda social haza l´asturianu. La RTPA tienlu nidiu, col contratu millonariu que recibe´l Real Uviéu pa que l´asturiana puea retresmitir los partios puen dase´l gustu de presionar al equipu carbayón pa que cuide que les pancartes reivindicatives nun ten nel estadiu Nuevo Carlos Tartiere.

El pasáu domingu 19 de Febreru, nos momentos inmediatos al entamu del partíu y de la retresmisión de la TPA la directiva del Uviéu ordenó la retirada d´una pancarta de la XPDLL nel derbi asturianu ente´l Uviéu y el Marino de Lluanco. El delegáu del campu del equipu arrincó la pancarta coles sos propies manes ente les protestes del públicu. El ramalazu fascista cunto cola participación de la policía nacional, sicasí estos tuvieron más xaciu y refugaron identificar a los portadores de la pancarta como pidía´l representante del Uviéu. El socesu sumase al ocurrió fai selmanes onde negóse-yos la entrada al estadiu a militantes de la Xunta por dir cuna pancarta.

Onde si pudieron facer l´actu vindicativu foi delantre la Xunta Xeneral, demientres el direutor del ente públicu asturianu, Perez Ornia, ufiertaba datos sobre los proyeutos de la RTPA dientru´l parllamentu. Ornia faló de que se taba estudiando les emisiones de la TPA vía satélite pa que los emigrantes n´América y Europa puean ver l´asturiana, de que l´ente asturianu xenerará 300 emplegos direutos ya indireutos, que nel entamu va haber ocho hores y media d'emisión qu´entamaran a la una del mediudía y van ser dos les productores asturianes encargaes de facer los programes pal ente, qu´habrá tres informativos (mediudía, nueche y a la hora del pieslle de les emisiones), desplico tamién que los redactores trabayarán pa los tres medios del ente (radio, tv y periódicu dixital) que les informaciones sirvirán pa emitir en radio y tv, asina ye más fácil manipular, sólo fai falta facelo una vegada, anque de xuru qu´a la fin retocaran les informaciones, por exemplu; qu´Areces inagura´l Museu de les Pites de Grau, perdón quixi dicir el Museo de las Gallinas de Grado y la Pita va recibilu na tv habrá que facer planos curtios del presidente pa nun ver a la Pita y los pitinos y nel casu la radio pues valdrá con baxar el soníu ambiente pa que nun s´oyan soníos nun deseaos pol presidente. Ornia dixo que yá ta confirmáu l´alcuerdu cola FORTA pa dotar a l´asturiana de coteníos foriatos, pol que pue emitir partíos de primera división y los partíos del Mundial si a la fin la FORTA consigui los drechos d´emisión. De lo que nun faló Ornia foi del porcentaxe d´emisiones n´asturianu. Si dixo que la radio, qu´entamara a emitir pa la seronda, tendrá un horariu acutáu pal asturianu y que´l porcentaxe de música asturiana diba ser d´un total del 30% na programación (música asturiana que non n´asturianu). Ornia aclarió que nun entamu la programación de la radio asturiana tara compuesta por boletines informativos cada media hora y música.

Los fechos acontecíos nel estadiu uvieín tornan a ser un clara amuesa de la falta de drechos democráticos n´Asturies yá qu´en toles entraes y abonos pue vese que "nun tán permitíes les pancartes que contengan símbolos, emblemes, llemes o lleendes q'impliquen incitación a la violencia", queda nidiu que nun ye´l casu de la pancarta de la Xunta. Daquién alcuérdase de los xuegos olimpicos de Barcelona´92, na ceremonia d´inauguración vista por millares de persones en tol mundu desplegose una pancarta d'abondos metros col llema “Catalonia is not Spain”, por poner un casu abondo conocíu.

¿Recibira´l Real Uviéu un puñadín de perres más por coartar la llibertá d´espresión d´un garrapiellu de xente qu'exercen los sos drechos?, ¿nun diba ser l´autonómica una televisión plural?, si agora nos partios nun se puen ver pancartes escontra les aptitues del gobiernu asturianu imaxinaivos tolo que nun vamos poder ver nos informativos de la TPA… O meyor, sinón se pue ver una pancarta qu´esixa una televisión asturiana n´asturianu que podrá oyise n´asturianu na RTPA cola rocea que yá produz una simple pancarta…

Por: eL trAsgU d´aRecEs | TeleTini | Comentarios (0) | Referencias (0)