eL trAsgU d´aRecEs

Martes, 14 de marzo de 2006

YÁ HAI NOMINAOS AL PREMIU DE LA MÚSICA´L MEYOR CANTAR N´ASTURIANU

L'Academia de les Artes y les Ciencies de la Musica d´España dio nuncia de los nominaos al meyor cantar n´asturianu, premiu que lleva entregándose dende fai tres años yá que l´Academia nun quixo reconocer enantes la condición de llingua pal asturianu. . Dientro de la categoría de meyor cantar n'asturianu los tres nominaos son el rock de "Los Berrones" col cantar "Fai Deporte" que grabaron en collaboración con un garapiellu de deportistes asturianos, el tamién rock pero más cañeru del grupu avilesín Dixebra col tema "Somos" y el cantante d'Avilés Vicente Díaz col cantar melódicu "El café del pescador" compuestu por Pepín Robles.

Dende que ñaciera esti premiu pol que tantu llucharan los músicos del país siempre tuvo enlleno de polémica. El primer añu, 2004, foi parar nes manes de Pepín Robles pol cantar “Nunca maís” interpretáu por Manolo Morán, d´aquella los músicos asturianos nun consideraran el cantar representante de la música astur y yá amosarán el so pesar namás conocese la preseleción pol asturianu usáu pal cantar enlleno d´errores gramaticales. El compositor Pepín Robles siempre sal nomináu en toles convocatories qu´hasta´l momentu se ficieron, quiciabes tenga daqué que ver que ye amigu de Victor Manuel, importante miembru de la SGAE. L´añu pasáu'l ganador fora Chus Pedro col cantar “Sal a baillar”, que tamién llevantara polémica por tar basáu nun tema tradicional, los temes nominaos tienen que ser orixinales, Robles lo taba pol tema “La Pola de Siero” interpretáu tamién por Vicente Diaz. Esti añu la polémica ta en que´l tema de Los Berrones nun taba ente los seleccionaos, amás de la repetición de Robles y Diaz con un cantar de romería demientres otros grupos asturianos de muncha mayor calidá nun tan nominaos, ¿onde tán la revelación del añu na música asturiana Skama la Rede?.

Ensin dubia'l cantar cola mayor calidá ye´l de Dixebra, amás Xune ye una de les persones que más llucho pola esistencia d´esti premiu. Sería de xusticia que llegara a les sos manes y pidiera la oficialidá delantre de tol auditoriu onde s´entregen los premios, pero de xuru que ye meyor dalo a un cantante de romeries que dará les gracies ensin glayar al altu la lleva les inxusticies que se cometen nesti país nomáu Asturies. El resultáu nel mes de mayu.

Por: eL trAsgU d´aRecEs | Música | Comentarios (0) | Referencias (0)