eL trAsgU d´aRecEs

Lunes, 20 de marzo de 2006

LA SELMANA DE LES LLETRES ASTURIANES VASE DEDICAR AL TEATRU

Esti añu´l día de les lletres asturianes va tar dedicáu al teatru. La Conseyería quier repetir l´ésitu de la pasada edición dedicada a la poesía contemporánea, en llugar d´un autor finao como yera habitual, que tubo una bona repercusión nos medios y nel públicu, amás de cuntar cola participación del poeta irlandés Seamus Heaney que llego a pidir la oficialidá nuna conferencia. Tamién se tien pensao trayer al dramaturgu y premiu Nobel Darío Fo pa que participe nos actos de la Conseyería.

Tamién se quier celebrar un espectáculu sobre testos d´autores catalanes y asturianos dirixíu pol director teatral Albert Mestres fecho en comuña ente la Oficina de política llingüística y l´Institució dels Lletres Catalanes. Los actos vanse desarrollar na primer selmana de mayu y tienen el so día grande nel día de les lletres, el primer vienres de mayu, nel que l´ALLA celebra la so Xunta estraordinaria cola acoyida d´un nuevu académicu, amás de la manifestación que tolos años recuerda que´l meyor homenax que se pue facer a la llingua y a los homes y muyeres que faen usu d´ella ye afitala como oficial nel estatutu d´autonomía.

Nel trescurrir de la selmana diversos grupos teatrales van percorrer el país colos sos espectáculos n´asturianu. Nun se pue escaecer que´l teatru ye´l xéneru lliterario que más problemes tien n´Asturies, yá qu´amás d´escribilo tien de ser representao. Pola contra´l teatru popular asturiano de los autores clásicos sigui enllenando teatros. Autores teatrales como Adolfo Camilo Díaz opinen que ye necesariu asentar les bases del nuevu teatru n´asturianu sobre´l vieyu teatru costumbrista que tanto ésitu de públicu tien. Nos caberos años los asturianos pudimos ver per primer vegada un Shakespeare n´asturianu amás d´otres obres del teatru universal na nuesa llingua. Esperemos que´l sofitu de la Conseyería de Cultura´l teatru n´asturianu nun remate na selmana de les lletres y continué más allá del día que conmemora a aquelles persones qu´escriben na nuesa llingua y dieron-y puxu a lo llargo de la historia.

Por: eL trAsgU d´aRecEs | Lliteratura | Comentarios (0) | Referencias (0)