eL trAsgU d´aRecEs

Sábado, 01 de abril de 2006

LA CARAVANA POLA OFICIALIDÁ LLEVA LA REIVINDICACIÓN LLINGÜÍSTICA A TOLOS PUEBLOS D´ASTURIES

El Conceyu Abiertu pola Oficialidá sigui colos actos pa esixir que la nuesa llingua algame l´estatus xurídicu de la oficialidá nel estatutu. La última idea del CAO pa facer visible la reivindicación llingüística por tolos pueblos d´Asturies ye la caravana pola oficialidá. L´actu consiste en congregar al mayor númberu d´automóviles faciendo sonar les bocines. La caravana yá percorrió la Cuenca´l Nalón con cerca de 30 coches adornaos con carteles y banderes y encabezaos por una furgoneta que diba dando pela megafonía conseyes pola oficialidá, munches vegaes llegaron a responder cola so bocina coches que diben na otra dirección.

La caravana tamién repartió ente la xente del llugar cartafueyos nos qu´esplicaben el significáu de la pallabra oficialidá y los argumentos de la so necesidá. El día fino nel Teatru L´Entregu cola Banda Gaites Rei Aurelio, el fólclore de L´Esperteyu, los poemes de Reciella Mallory, amás de los cantares de Carlos Rubiera y Los del Bosquín, los monologos de Cellero y los grupos Tuenda y Nuberu.

Esti fin de selmana la caravana tuvo peles llocalidaes de la rodiada d´Uviéu, l´actu fino na Casa de Cultura de Siero colos cuentos de Milo'l del Nido, el teatru a cargu del IES Ríu Norte y la coral Santa María de Lliere.
L´actu central de tola campaña del CAO va tar el día 7 d´Abril nel Teatru Filarmónica d´Uviéu. Los cantantes Anabel Santiago y Toli Morilla, el gaiteru Xuacu Amieva y el grupu Felpeyu conformen el cartel d´actuaciones. L´actu entamara a les 19.30 y cuntará cola participación de representantes qu´intervendrán pa falar de la necesidá d´incluir la oficialidá na reforma del estatutu.

Por: eL trAsgU d´aRecEs | Llucha | Comentarios (0) | Referencias (0)