eL trAsgU d´aRecEs

Sábado, 01 de abril de 2006

LA LLINGUA Y LA RTPA

Yá se presentaron les diverses empreses que van producir los programes de producción propia n´autonómica y un avance de cómo va ser la parrilla de programación. La información foi dada na comparecencia de Perez Ornia na Xunta Xeneral. La programación será de 18 hores, va a haber tres informativos de 45 minuos, a les 14.00, 20.00 y a la hora del pieslle, los dos primeros tamién van tener un resumen deportivu de 10 minutos. A les 18.00 habrá un programa infantil de 15 minutos con muñecos basaos na nuesa mitoloxía, esti será n´asturianu. Después vendrá l´Asturias Directo, xusto enantes del informativu y de nueche habrá un magazín llixeru. Nel fin de selmana primaran los deportes y una vegada´l mes habrá un programa de más de 3 hores grabáu cada edición nun conceyu asturianu pal que se cuntaran con grandes medios. La RTPA cuntara con delegaciones en Madrid, Uviéu, Xixón, Avilés, Navia, Cangues d´Onis, Llangréu, Mieres y Canguas del Narcea. La mayor parte de la programación, amás de les distintes delegaciones, serán encargos a productores, nes que pudieron apañar un bon cachu los periodicos asturianos, asina Areces y Ornia asegúranse que los medios impresos asturianos miren siempre con bonos güeyos les acciones de l´autonómica. La masiva externalización de los programes pon en dulda la función que van desempeñar les 100 persones que conformen la plantilla fixa de la RTPA.
De lo que nun falo Ornia foi de la presencia de la llingua na TPA, dexo que falara´l diputáu del PSOE que dixo que la presencia de l´asturianu será la llóxica y razonable. Pel momentu lo llóxicu y razonable pal PSOE son 15 minutos al día, y too esto gracies a les presiones d´IX-BA. La porción será pal infantil “Presta a asgaya”, una especie de Barrio Sesamo colos personaxes basaos nos seres de la mitoloxía asturiana, lo que nun sabemos ye si esti programa incluirá dibuxos animaos y si estos tarán al menos n´asturianu, que se sepa l´asturiana nun ta tornando nenguna serie a la nuesa llingua. N´Avientu del añu pasáu un conseyeru de la RTPA dixo nuna entrevista a Les Noticies que tábase preparando un infantil, esti, y dos magazines n´asturianu, a ver que tal… lo que nun va a haber pel momentu ye nin media hora de información diaria n´asturianu o una serie na nuesa llingua, polo menos un informativu diariu yera lo mínimu d´esperar. Del cine yá nin falar y eso que en toles autonómiques foi´l meyor metodu de normalización llingüística y pasu previu pa que tamién s´estrenaran películes n´otres llingües nos cines, amás de la industria que se pue xenerar nel campu del doblaxe, inesitente n´Asturies. Onde si paez que pue tener una presencia curiosa l´asturianu será na RPA, Ornia dixo que va a haber unes hores acutaes pal asturianu y que habrá un 30% de música fecha n´Asturies, pero tamién dixo que la radio emitirá dacuando nun lo faiga la televisión, asina que eses hores pal asturianu podrien ser de 3 a 6 de la mañana, too ta por ver y de momentu paez qe n´asturianu vamos poder ver poco na RTPA.

Esta selmana l´ALLA tamién falo de l´asturianu y de la RTPA. L´Academia torno recordar que la televisión tendría de ser billingüe al 50%, ensin nenguna marxinación pal castellán y l´asturianu, que na radio y nel periodicu dixital la llingua mayoritaria tendría de ser l´asturianu. L´ALLA recordo que s´entrevistaran con Ornia al ser nomáu director del Ente y la so posición ye conocida polos responsables de l´autonómica. Los responsables de la institución llingüística falaron que dende´l 2003 que dieron a conocer la so posición nel parllamentu cuando se taba tramitando la llei de medios audiovisuales hasta agora nada se sabe sobre la presencia de la nuesa llingua na RTPA.

Por: eL trAsgU d´aRecEs | TeleTini | Comentarios (0) | Referencias (0)