eL trAsgU d´aRecEs

Jueves, 13 de abril de 2006

L´ASTURIANU VA FACIENDOSE GÜECU NES ESCUELES

Fernando Radilla, asesor teúnicu docente de la Conseyería d´Educación, apurrió datos sobre´l procesu d´escolarización de la nuesa llingua. Les cifres foron daes fai selmanes nel alcuentru d´educación en llingües minoritaries de l´ALLA.
La escolarización dio un emburrión nos caberos años. En 6 años pasose de 15.000 a 19.000 alumnos, pese a la baxa natalidá d´Asturies. La zona con más estudiantes son les Cuenques Mineres y son 260 los profesores qu´imparten l´asignatura en tol país.
En primaria un 53% de los alumnos estudien l´asignatura nel 85% de los centros. Les cifres son muncho menores en Secundaria, al rodiu d´un 10%. Hai 30 centros de primaria onde tán matriculaos el 100% de los alumnos. La escolarización de la fala eonaviega va más sele yá que´l procesu entamo más tarde.
Tamién vase entamar a preparar n Programa Xeneral de´Enseñanza p´Adultos pa cumplir cola llei d´usu, yá ye hora dempués d´ocho años!!!. Radilla afitó que la meyor midía que se pue tomar pa iguar la enseñanza de la Llingua Asturiana ye la declaración d´esta como llingua oficial. Yo nun voi dicir lo contrario.
Si la escolarización medra cada añu a pesar del pocu enfotu que-y pon el “señor” Riopedre, nun hai escusa pa entamar a usar l´asturianu como llingua vehicular d´otres materies y pa que na educación infantil les clases seyan daes a fala mayoritaria de los escolinos, seya castellán o asturianu. Ye sangrante como en munches zones rurales onde la única llingua de los escolinos ye l´asturianu toles clases son daes en castellán y deprendese-yos a los neños que les coses nun son como ellos les nomen, enseñando-yos dende pequeñinos qu´eses pallabres solu son pa dientro casa, pa fuera en correutu castellán. Que como dixo la Conseyería fai pocos años nun hai alumnos monollingües n´asturianu, que ye que falen mal castellán, tienen problemes pa deprender y hai qu´aumentar les clases de castellán, esto anque paeza de los tiempos de don Paquito, ye d´agora del tiempu de Tinín y ye la puta realidá antidemocrática que prautica la FSA.

Por: eL trAsgU d´aRecEs | LLINGUA | Comentarios (0) | Referencias (0)