eL trAsgU d´aRecEs

Viernes, 28 de abril de 2006

ESTUDIU SOCIOLLINGÜÍSTICU SOBRE´L NORTE DE LLIÓN

Esta selmana l´ALLA presento un estudiu sociollingüíticu sobre 17 conceyos del norte de Llión que tien p´asoleyar. La obra ta ellaborada por Gonzales Riaño y García Arias a partir de 400 entrevistes fechas a persones de toles edaes de estos 17 conceyos qu´atiesten con Asturies. Los autores afitaron que l´estudiu ye totalmente llingüísticu y nun quier dar conseyos políticos o entrometese na opinión de los llioneses sobre la so “llingua tradicional”. A pesar d´ello anduvi per foros llioneses y tope con opiniones que falaban d´intromisiones de l´ALLA y reproches haza la institución diciendo que foron ellos (l´academia) quien frayo cola xunidá del idioma al nomase Academia de la Llingua Asturiana y non asturllionesa y basar el estándar lligüísticu nes fales centrales asturianes y non facer una normativa común pa tol dominiu llingüísticu, les opiniones verties nos foros retrucaben que sinón se quisieren entrometer por qué s´incluyíen entregues sobre pertenencia a la tierra y les opiniones más negatives llevaben a dixebrar los dos idiomes pa refugar la normativa asturiana. Sicasí les opiniones mayoritaries yeren favoratibles a esi estudiu y glayaben pola xunidá pa lluchar polos drechos de la llingua a ambos llaos del Cordal. Dalgunos de los datos estrayios son estos;

PERTENENCIA A LA TIERRA;

66% de los encuestaos declarense llioneses
72% de los encuestaos declaren tener una mayor afinidá colos asturianos que con otres comunidaes vecines

38% de los encuestaos camienten que'lfuturu de Lleón como comunidá pasa por una xuntura con Asturies
28% Lleón solu
21,5% Lión con Castiella

LLINGUA;
18,5% refiése a ella como astur-lleonés
15,5% identifícala col términu "bable"
15,7% quier falar más de castellán
15,5% fala de "pal.luezu" términu esti que namás cinca a la faza l.lacianiega y la so redolada
Los nomes "bable" y "asturlleonés" son los preferíos de la xente más mozo, mentantu que'l nome "castellán" ye'l preferíu pola xente más vieyo, mandándose les edaes intermedies pol restu de categoríes de denomación como "asturianu" o "lleonés", dalgo que lleva a los autores a pescanciar que la xente más mozo de la fastera nor-lleonesa "paez que sigue, pelo menos de lloñe, el procesu asturianu y d'ello surde daqué identificación con elli y nun tien prexuiciu a identificar la so fala col nome astur-lleonés, asturianu o, col más neutru, bable"

50% de los encuestaos refuguen la esistencia d'una posible "unidá llingüística" col asturianu
L'estudiu afita a les clares que pa los habitantes d'estos conceyos danse unes semeyances mui grandes ente la so fala tradicional y l'asturianu, al empar que-yos abulta que la so fala estrémase claramente del castellanu

54% refuga la consideración de la fala tradicional como llingua
37% de persones favoratibles al estatus de la fala tradicional como llingua
Los investigadores ven "un datu sociollingüísticu indicativu" el fechu de que nel espaciu humanu lleonés, onde "nin les campañes en pro del idioma tradicional foron notories nin la terminoloxía al usu favoratible, nin l'emplegu social un afalagu, más d'un terciu de la xente considere llingua al so falar".

No tocante a la pervivencia de la fala local como elementu de comunicación y como llingua materna, la encuesta amuesa unos datos con lluces y solombres, rescamplando como munchos de los entrevistaos pasaron de falar la llingua propia de neños a falar castellanu d'adultos. D'esta miente los entrevistaos atalanten qu'hai un peligru real de desanicie de la fala. Respective al futuru del idioma, la encuesta espeya como les persones encuestaes amuesen un sentimientu conservacionista, pero ensin marcase pola oficialización de la fala tradicional, anque si al favor de que se-y dea un índiz ensin determinar de "reconocimientu xurídicu". D'otra manera, gran parte de los entrevistaos tán a favor de que se dea una collaboración con Asturies pa entamar midíes de Política Llingüística y tamién a favor de que se ponga la fala tradicional nes escueles. Una de les conclusiones más positives del estudiu ye que defende que nun hai estigma llingüísticu, siendo que la mayoría de los encuestaos nun percibe que la fala tradicional sía "falar mal".

Por: eL trAsgU d´aRecEs | Ástures | Comentarios (1) | Referencias (0)