eL trAsgU d´aRecEs

Domingo, 30 de abril de 2006

PLATAFORMA POLA XUNIDÁ DEL ASTURIANISMU

Ayeri nel conciertu pola oficialidá una asociación nomada Asturies Ciudadana paño más d´un centenar de firmes pola xunidá del asturianismu (AA-IAS-PAS-URAS). La iniciativa ensin dubia ye necesaria pa un movimientu minoritariu y dixebráu, ¿pero ye posible?. Por un llau ta´l rexonalismu de dreches, el PAS-URAS que ya van participar xuntos nes próximes eleiciones como Unión Asturianista, y per otru llau la izquierda independentista (IAS-AA), el segundu bloque qu'enxamás pescancie como podíen dir dixebraos. Ensin dubia l´asturianismu xunido fadría muncho más que caún pel so llau, pero ye posible ente dos bloques tan estremaos en ideoloxía y táutiques. Yo nun lo veo, prestaríame poder velo, pero por desgracia esti movimientu tien unos cabezaleros que nun foron quién a consiguir facer un res en 20 años y ye de recordar aquella vegada que la Coalición Asturianista llogro un escañu na Xunta Xeneral, pero´l diputáu yera Sánchez Vicente y a les dos selmanes desfizo la coalición frayando la espera xunidá del nacionalismu. Esta xunidá tendría de ser posible, en Galiza´l BNG ta formáu por partíos galleguistes de toles ideoloxíes que tienen en Galiza´l so máximu enfotu, por desgracia paez que munchos dirixentes asturianistes tienen más enfotu na so figura que n´Asturies. El nacionalismu asturianu ta medrando, pero tan selemente y tan dixebráu qu´en 20 años podríemos tar ensin dengún diputáu y con 10 sigles concurriendo a les eleiciones. L´asturianismu necesita la xuntura, sobremanera dende la izquierda, y si esto fore posible necesitaría una renovación de cabezaleros, nun ye posible que dende Conceyu Bable sigan tando los mesmos, los mesmos que tuvieron más esmolecíos en insultar al vecín qu´en garrar puxu na sociedá asturiana y d´andechar en comuña. La xunidá del asturianismu tendría de ser posible, y necesaria si de verdá tuvieren como únicu enfotu Asturies, pero tendría de dir de la mano d´una renovación de cabezaleros, de xente moza que traxera nueves idees y nueves formes de trabayar, de xente que tenga como únicu enfotu´l bien d´esti país.

¡¡PUXA ASTURIES DIXEBRÁ!!!

____________________________________________________________

Asturies Ciudadana ye un grupu de ciudadanos asturianos que ta esmolecíu pol estáu xeneral del nuesu país, pol de la so llingua y, perespecialmente, pola falta de iniciativa político de los nuesos llíderes.

A tal efeutu, Asturies Ciudadana ta desendolcando dende ayeri una campaña al favor de la xunidá del PAS, la URAS, AA ya IAS nuna mesma coalición. Pa conseguir esto tamos pidiendo firmes de asturianos de dientro y fuera d'asturies. Vamos dir pelos conciertos (yá fuimos ayeri pel conciertu pola oficialidá sacando un bon garrapiellu de firmes), vamos dir a les manifestaciones (esti vienres vais poder venos na Estación del Norte), vamos dir poles llibreríes y pubs asturianistes (Si mos dexen los sos dueños poner fueyes y cartelos pa firmar)...

L'oxetivu ye algamar un bon númberu de firmes, que se puea contar por miles, y llevalu ente la prensa y ente los partíos políticos asturianistes. QUeremos poner a Sergio Marqués, a David Rivas, a Xuan Xosé Sánchez Vicente y a Faustino Zapico contra les cuerdes, queremos dir a les sedes de los sos partíos con milenta firmes y ver qué dicen.

¿Ñegaránse al ver (si ye que conseguimos tantes) 4.000, 5.000, 10.000 firmes o les que seyan pidiendo la xunidá del asturianismu?

YO creyo que non, porque creyo qu'un llápiz y un papel pueden camudar munches coses... Si la oficialidá depende d'un llapiz y un papel... ¿Nun dependerá tamién la xunidá de los asturianistes de munchos llápices y munchos papeles?

Si tas interesáu en collaborar con nós pidiendo firmes, ponte en contautu en:
asturiesciudadana@hotmail.com

La nuesa web (nun vos esperéis gran cosa, pues nesta asociación nin se paguen cuotes nin siquiera tamos rexistraos oficialmente) ye esta:
www.asturiesciudadana.blogia.com

Por: eL trAsgU d´aRecEs | Opinión | Comentarios (7) | Referencias (0)