eL trAsgU d´aRecEs

Jueves, 04 de mayo de 2006

ESPERANDO L´ALSA...

Falta una hora pa salir pela puerta pa marchar a Bilbo y garrar l´ALSA pa dir a Asturies, tornar a casa. Fai dos selmanes que tuvi pero paecen sieglos cuando tas lloñe del to país. Mañana'l trasgu d´Areces tara na mani pola oficialidá y dempués na xunta estraordinaria de l´ALLA, esperando que seya´l caberu añu que tengamos que salir a la cai'l día grande de la llingua d´Asturies pa esixir los nuesos drechos. Mañana mercare n´Uviéu enantes de la mani “Anabel Santiago canta a Diamantina Rodriguez” y podre ver el DVD que regalen editáu pola RTPA, editáu pero ensin emitir que ye n´asturianu. Incluye la serie “Cinco poemes” fecha pal día de les lletres del añu pasáu qu´echaron por TVE-Asturies amás de dos curtios fechos pa la ocasión por Javier Maqua (Carne de gallina) y Ramón Lluis Bande (amás del so curtiu de la serie Cinco poemes, “Paniceiros”, dos vegaes por un fallu técnico, Bande por triplicáu pol día de les lletres por cortesía de la Oficina de Política Llingüística!!!). Mañana hai que glayar bien fuerte qu´esiximos la oficialidá porque ye´l nuesu drechu, que manden güevos les pallabres de Migoya y Madera, diciendo que´l Plan de Normalización ye lo meyor fecho pa la llingua, qu'ellos sofitaron siempre´l teatru n´asturianu, que se ta estudiando la programación n´asturianu que se pue facer pa la RTPA (que coyones habrá qu´estudiar, l´asturianu val pa cualesquier programa que se quiera facer nel casu que lo quieran facer, paez que falen d´un esperimentu científicu en llugar d´una llingua), que la toponimia va tan bien que mete mieu (fai un añu dende l´aprobación de los caberos espedientes toponímicos) y que la FSA ye coyonuda y la de Dios pa la llingua pero d´oficialidá nadená.
El domingu nel ALSA cuando tenga que tornar otra vegada de xuru que m´alcordare de la mani demientres pasen les cuasi cinco hores que dura´l trayeutu Uviéu-Bilbo (por ciertu, por qué ALSA, que ye una empresa asturiana, respeta nos sos billetes la toponimia vasca y non l´asturiana, merque´l billete n´Uviéu o en Bilbo pon Oviedo-Bilbao/Bilbo). En dalgún requexu del camín repasare les pallabres del discursu d´Ana Cano que quedaron na mio memoria. Cuando llegue a San Mamés, la estación de Bilbo, baxare al metru pa dir a casa y entamar a cuntar los díes que falten pa volver, pero nada d´esto paso, too foi una lleenda urbana…

Por: eL trAsgU d´aRecEs | Opinión | Comentarios (0) | Referencias (0)