eL trAsgU d´aRecEs

Lunes, 08 de mayo de 2006

UN AÑU MÁS DE REIVINDICACIÓN, UN AÑU MENOS DE LLINGUA

Como cada añu tornamos a ocupar la cai Uria pa esixir los nesos drechos democráticos como falantes d´una llingua minoritaria. Según los medios ente 2.000 y 3.000 persones tuvimos ellí, poques persones si se tien en cunta que tase negando un drechu humanu y que tamos (o non) a puntu d´entamar la reforma del estatutu. Ye verdá que la pallabra más guapa de la nuesa llingua nun falto a la mani (l´orbayu dionos fuelgos pa siguir glayando) y que la caravana pa entrar n´Uviéu facía tardar venti minutos n´entrar na capital, pero onde taben les 7.000 persones que faltaben y tuvieron na mani del CAO del 5 de payares, ye verdá que la xente yá ta farta de llevar trenta años ensin qu´esto s´igüe y hailos que yá nun s´alcuerden a toles manis d´esti sen a les que foron, pero como diz el títulu d´esti artículu ye un añu más, como otru cualesquiera, que la xente trabaya o tien más coses que facer y fai tiempu que fartose de lluchar pa que prauticamente nada vaya p´alantre, pero nun podemos escaecer que tamién ye un añu menos pa la llingua y que de siguir asina en dos xeneraciones atoparémonos col desaniciu total del nuesu idioma hestóricu. Un datu esperanzador; el 75 % de les perones que caleyaben pela cai Uria nun llegabamos a 30 años, habialos tamién que polo menos debieron tar naquella mani que diba detrás d´una pancarta col llema “Bable nes escueles-Autonomía rexonal”.

La mani entamo a la hora anunciada col orbayu y la pita de collacios de viaxe, con toles organizaciones participantes detrás de les sos pancartes glayando por un deseyu común a toos; OFICIALIDÁ. Ente los asturianos que tuvimos ellí ví a xente conocida del asturianismu cultural; dellos componentes de Skama la Rede, Xune de Dixebra, la Caunedo, l´escritor Pablo Texón, la presentadora de “La tele de los escolinos” o "políticos" como Rafa Palacios que tovía nun entamó la so cuarta vuelta´l mundu. Y una entruga; ¿onde taben la xente del PAS y la URAS?, na mani nun los ví y na Plaza Porlier nun ví denguna bandera?, ¿cómo pue haber un partíu asturianista, de la idioloxía que seya, que nun tea na mani del día de les lletres?.

Una vegada llegada la mani a delantre del Filarmonica un portavoz de la Xunta lleó´l discursu onde criticó al RIDEA por nun aceutar una ponencia n´asturiana nes Xornaes d´Estudios ¿asturianos?, lo que fizo que tolos congregaos llanzaron un gran xaréu escontra la institución dependiente de la Conseyería de Cultura asitiada n´esa mesma plaza, criticóse al gobiernu pola represión y diose nuncia de les próximes convocatories; el 10 de Mayu a les 19.00 delantre de sé del RIDEA pol casu de la ponencia y el vienres 19 ente la Xunta Xeneral en sofitu de Radio Sele pol robu de la so llicencia pol gobiernu asturianu anque'l Tribunal Superior de Xusticia d´Asturies diera-y la razón.

Dempués llego´l turnu de l´ALLA y la so Xunta Extraordinaria. Pa mí esti ye un de los momentos más especiales del añu; ver a tolos asturianistes xuntos sofitando a la nuesa institución llingüística ensin división (daqué tenia qu´haber que nun mos dixebrara). Abondos foron los momentos nes que los pelos poníenseme de punta. De xuru que foi la Xunta de l´ALLA na que más fala occidental s´oyo, y ye que l´academia nomo a´l Galano, escritor eonaviegu, académicu d´honor. Si esti añu´l día de les lletres nun se dedicaba a un escritor sinón a un xéneru, el teatru, l´escritor protagonista foi´l Galano, hasta Migoya lleó un testu d´él na presentación de la Selmana, y ye raru que dende la Conseyería se sofite daqué de l´academia. El discursu de Galano foi interrumpío delles vegaes poles rises y los aplausos del públicu. El nuevu académicu falo de que la fala tenía muncho más prestixu agora gracies al llabor de Xeira y l´ALLA, destacando la publicación de l´academia “Entrambasaguas” diciendo que yera la primer vez qu´esistía una publicación continuada na fala. L´escritor eonaviegu amosó la so allegría pol nomamientu y afito que tovía nun podía creyese tal honor. Dempués llego´l turnu d´Ana Cano como presidenta de l´academia. Duel ver como tolos años fálase de los mesmos pilancos pal idioma y cada añu hai que dir sumandu (presencia de l´asturianu na RTPA por exemplu). Ana Cano dedico la mayor parte del discursu en criticar l´espansionismu gallegu sobre los conceyos más occidentales d´Asturies, Ana Cano tuvo que parar delles vegaes el so discursu polos aplausos de los asistentes. Ensin dulda la fras más aplaudida del actu foi cundo la presidenta afito que “l´Academia siempre entenderá Asturies como una unidá histórica, social, política y cultural incuestionable”. Cano tamién critico´l posibilismu, en referencia a Ramón d´Andrés y IU-BPA, yá que la única posibilidá ye la oficialidá, torno a falar del pautu presentáu l´añu pasáu que quedo pa prau al nun aceptar la FSA-PSOE la oficialidá y nun escaeció dicir que los culpables de que tovía nun esistan estudios reglaos de Filoloxía asturiana tán n´Asturies.

Dempués los periodistes Sonia Avellaneda, amás presentadora del actu, y Prospero Morán lleeron poemes del nuevu númberu de Lletres Asturianes. Llueu diose pasu a l'actuación del tríu DRD (lo que nun pue ver foi l'actuación de Bibiana Castañón) y l´actu fino col Himnu d´Asturies como ye vezu. Nel so discursu la presidenta encamentó a tolos presentes a asistir l´añu que vien al próximu día de les lletres, ¿será necesaria manifestase otra vegada enantes pola oficialidá?. L´otru día suañe que non, ye prestoso pensar que los suaños faense realidá.
____________________________________________________________

COMUNICÁU DE LA XUNTA POLA DEFENSA DE LA LLINGUA
Otru Día de les Lletres. Hailu que yá perdió la cuenta de cuántos años llevamos manifestándonos, saliendo a la cai a esixir un derechu fundamental de la persona: la posibilidá llegal d’usar la llingua propia en cualquier situación de la vida. Los demócrates de verdá diben plasmar si supieren que n’Asturies, con décades yá de gobiernos democráticos, tovía ye illegal usar otra llingua que nun seya’l castellanu. ¡Y fálennos d’imposición a nós, que somos los que la sufrimos! ¡Guapa manera de da-y la vuelta a una culpa que nun ye más que de los que nos nieguen derechos!
Llega’l Día de les Lletres y conseyeros y directores xenerales asoleyen los grandes llogros en política llingüística y faen declaraciones rotundes. La Xunta pola Defensa de la Llingua Asturiana enxamás va criticar los avances qu’haya na promoción del asturianu: bien ta que s’oficialice la nuesa toponimia, qu’aumenten los presupuestos pal nuesu idioma..., pero lo que nun vamos almitir ye que se mienta y se quiera embabucar a la xente. Y ye que dellos responsables de la Federación Socialista Asturiana y del Partíu Popular vuelven col cantar de qu’ellos tán pola promoción, pola protección, pola voluntariedá y non pola oficialidá y la imposición. Yera pa rise pola floxedá de razonamientos tan ruinos... si nun supiéremos que la mentira milenta veces repetida acaba caltrizando na opinión pública. A eso tán xugando.
Queremos dicilo alto y claro, otra vez más: promoción y oficialidá, voluntariedá y oficialidá nun son conceptos escluyentes. La oficialidá nun ye imposición. Imposición ye la situación que sufrimos agora onde namás el castellanu ye llegal. La oficialidá ye dalgo tan cenciello como que se reconozan los derechos llingüísticos a tolos asturianos y asturianes, falen la llingua que falen. ¿Cómo-yos costará tanto entendelo? ¿Será que la so idea de democracia nun ye más qu’un barniz qu’echen según la so comenencia?
Hai otra mentira más nesi tipu de declaraciones. Y ye que la promoción ensin más, ensin una marcación llegal d’oficialidá lleva a la desaparición progresiva de la llingua minorizada. Ehí tán los estudios sociolóxicos pa demostralo, pero tamién la nuesa esperiencia diaria. ¿Qué llingua fala la mocedá d’Asturies depués de tantos años y de tantos gobiernos asturianos partidarios de la famosa «promoción»? ¿Cómo quieren qu’una llingua gane falantes y prestixu si ye illegal usala?
El problema ye que los amantes de la promoción y de la llibertá —pero que se nieguen a conceder la oficialidá— nun ye que tean confundíos y nun se dean cuenta: ye que lo dicen a sabiendes. Y dicen coses como que l’asturianu yá lo pue usar quien quiera, qu’hai oficialidá de facto... Claro, deben dicilo poles munches asociaciones que nun puen llegalizase presentando la documentación n’asturianu, o poles tesis doctorales refugaes por tramitase n’asturianu, o polos munchos escolinos que nun puen estudiar asturianu nos sos centros, o polos estudiosos que nun puen presentar una ponencia n’asturianu nun congresu entamáu por una institución oficial que se llama —nun vos rir— Institutu d’Estudios Asturianos. Esa ye la realidá de la promoción a cencielles: indefensión llegal, marxinación, represión.
Tamos nun momentu políticu importante pal futuru del asturianu y del gallego-asturianu. En tol Estáu español tán reformándose los sos estatutos y n’Asturies tamos tamién nesi procesu. Ye la ocasión pa incluyir la oficialidá y por eso cientu cincuenta entidaes asturianes tamos trabayando por esparder esi mensaxe per Asturies nel Conceyu Abiertu pola Oficialidá. Son munches les declaraciones que se tán faciendo sobre les postures de cada partíu, pero tamos enfotaos en qu’Asturies nun pue ser diferente nin menos que naide. A la fin, el bon xacíu, la sensatez, l’altura de mires tien que s’imponer nos cabezaleros de la FSA y el PP perriba de les zunes personales y el provincianismu. Tienen que se poner a l’altura de la sociedá asturiana que, mayoritariamente, nun tien esos mieos y esos prexucios que tienen dellos políticos.
Sicasí, refórmese l’estatutu d’equí a dos meses o d’equí a dos años, con pactu ente los partíos mayoritarios o ensin él, fagan lo que fagan, un estatutu ensin oficialidá diba ser un fraude, una burlla. Dirán lo que quieran, lo que yá tán diciendo: que nun hai demanda, que la xente nun lo quier, pero ellos saben que la oficialidá ye l’únicu tema social y cultural que se vien reivindicando en tolos debates estatutarios y ye’l que vien movilizando nestes décades a más xente y a más entidaes y asociaciones. ¿Cuánta demanda social hai pa la montonera de lleis que s’aprobaron na Xunta Xeneral? ¿Midió daquién la demanda de caúna d’elles? ¿Cuntaron a la xente que se manifestaba? Non. Nun son más que sides pa nun s’encarar cola realidá: qu’hai un sector mui importante de la sociedá que reclamamos daqué que ye de xusticia y que ye una vergüenza que partíos que se dicen democráticos entá nun garantizaren esi derechu.
Pero que-yos quede bien claro: la nuesa llingua nun va desapaecer por decretu o por un estatutu que nun recueya la oficialidá. Y el movimientu de reinvindicación tampoco. Equí tamos y equí vamos siguir tando pa llograr la oficialidá. Nun nos val otra cosa. Somos mui necios y amás tenemos tola razón y tol derechu. ¡L’asturianu, llingua oficial, yá!
____________________________________________________________

DISCURU INSTITUCIONAL D´ANA CANO, PRESIDENTA DE L´ACADEMIA DE LA LLINGUA

Ilustrísimes autoridaes, señores académicos y académiques, asturianos y asturianes, amigos toos:
Quixera entamar el mio discursu institucional dándovos les gracies más fondes a toos y toes pola vuesa presencia, porque, como siempre, acudís al llamáu añal de l'Academia de la Llingua Asturiana pa festexar xuntos, nesti actu solemne que mos aconceya, el Día de les Lletres Asturianes.
Güei ha ser pa nós, y pa tolos asturianos y asturianes, un día de gayola y de contentu, porque ye un día d'homenax a la lliteratura asturiana, a los homes y muyeres que la ficieron vidable, nel pasáu y nel presente; y, darréu d'ello, un día d'homenax a la llingua na qu'alita. Gracies al bon facer de munchos de los nuesos escritores podemos dicir con orguyu que la lliteratura asturiana ye yá una realidá bultable, en cantidá y en calidá, que se pue midir ensin rocees coles lliteratures que se faen nes otres llingües del estáu; y ello magar los pilancos qu'enarten l'idioma que-y val de mediu d'espresión.
Como xa é avezo dende ha tempo, na Xunta Estraordinaria del Día das Lletras acoyemos a os novos académicos. Neste caso a Institución recibe como membro d'Honor a Manuel García-Galano, que dedicóu ¯y einda dedica¯ toda úa vida á llingua y á cultura del territorio máis occidental d'Asturias, el territorio d'Entrambasauguas. Nél queremos simbolizar ademáis el homenaxe a os autores das lletras de noso.
Nun é este el momento de trazar úa semblanza detallada nin da súa vida, nin da súa obra, peró nun podo deixar de recordar os muitos y bus frutos que deu y dá nel campo da música, da recoyida del léxico eonaviego o da creación lliteraria. El Galano, como nos presta chamallo, é autor de contos y de relatos curtios, peró sobre todo é un home de teatro, de teatro popular, da xente y prá xente. Nesta estaxa fexo cuase de todo. Foi actor, director del grupo Ameicer, coautor ou autor de mui ben obras teatrales representadas sempre con muito ésito.
El Academia publicóu nel ano 2000 [dous mil] el llibro Erguendo el telón unde s'incluyen as últimas cinco obras estrenadas pol Galano. Dende a creación da revista Entrambasauguas, nel ano 1996 [mil novecentos noventa y seis], el noso autor axuda nella con contos y artículos de todas as menas, qu'a Institución recoyéu hai ben pouco nel llibro Vento d'outono.
Axuntamos este nomamento al del veigueño José Antonio Fernández Vior, nel ano 2003 [dous mil tres], como académico correspondente; y é señal, outra vez, del compromiso inequívoco del Academia col asturianidá dos conceyos máis occidentales d'Asturias; y, sobre todo, cua xente y as institucióis que trabayan pola conservación y dignificación da súa llingua y da súa cultura; personas y institucióis, todas ellas, que, sin duda, atopan un referente, un espeyo unde mirarse, na trayectoria vital y nel trabayo da persona qu'hoi entra nesta Academia.
Gracias, querido Galano, pol tou llabor, por aceptar xuntarte a nosoutros. Aguardamos, de verdá, que t'atopes.
El compromisu institucional col Navia-Eo encóntase nel mandáu de los propios estatutos de curiar los derechos llingüísticos de tolos asturianos y asturianes y, de mou espresu, los de los falantes del gallego-asturianu; y atopa calce d'espresión per ente medies de la Secretaría Llingüística del Navia-Eo dende la que l'Academia atiende, dientro de les sos posiblidaes, tol procesu de dignificación y recuperación llingüística y cultural d'esa fastera. Con esti enfotu, l'ALLA espubliza la revista Entrambasauguas; edita materiales educativos; fai un siguimientu de la escolarización de la fala; atiende a la formación del profesoráu; organiza cursos d'alfabetización d'adultos, campañes de normalización o xornaes d'estudiu.
Asina, y namái como exemplu, l'Academia vien d'espublizar el volume Actas das Segundas Sesióis d'Estudio del Occidente entamaes n'A Caridá n'abril de 2005 y que constitúin l'estudiu actual más rigorosu sobre les tierres del Navia-Eo; y tien peravanzáu un informe sobre la so realidá llingüística, sociollingüística y cultural que fraya tópicos interesaos, remanaos pol espansionismu de determinaos sectores del nacionalismu gallegu, ciegos pa entender esta realidá llingüística, social y cultural.
Nun quiero dexar d'afitar, otra vegada, que l'Academia entiende l'eonaviegu como la llingua propia d'esi territoriu, u habrá ser oficial al empar que lo seya l'asturianu en toa Asturies; y qu'enxamás renunciará a la asturianidá de los conceyos nél asitiaos.
Inda más, l'Academia persabe, nesti sen, que dellos sectores minoritarios asturianos o, meyor, dellos asturianos taríen dispuestos a asumir la galleguización llingüística y cultural del territoriu d'Entrambasauguas como tributu a pagar p'alagamar una hipotética oficialidá de la llinguia asturiana. Pues bien, damos equí anuncia solemne qu'estes postures y los sos patrocinadores tendránnos siempre radicalmente a la escontra y que l'Academia siempre entenderá a Asturies como una unidá histórica, social, política y cultural incuestionable.
Fai agora xustamente un añu, nel discursu institucional del Día de les Lletres de 2005 di anuncia pública de la Propuesta d'un Alcuerdu Social y Políticu sobre la Llingua y la Cultura d'Asturies que l'ALLA habría ufiertar al Gobiernu del Principáu, a les fuerces polítiques, sindicatos y organizaciones sociales y culturales, col envís d'algamar un gran pautu social y políticu qu'afitare d'una vez la sobrevivencia de la llingua y la cultura d'Asturies, al marxe de les llexítimes y estremaes conceiciones ideolóxiques, polítiques y sociolóxiques sobre esti asuntu. La propuesta organizábase, como de xuru persabéis, al rodiu de cinco exes de los que'l primeru yera'l de la reconocencia espresa del asturianu como llingua co-oficial nel Estatutu d'Autonomía. Arriendes d'ello, l'alcuerdu nesti primer puntu yera condición pa siguir avanzando nos otros exes de la propuesta.
L'Academia, acordies col compromisu d'entós, treslladó a tolos axentes sociales les llinies básiques de la citada Propuesta y caltuvo, a lo llargo de los meses de mayu y xunu, toa una riestra de xuntes coles estayes sociales más representatives de la sociedá asturiana: Presidenta de la Xunta Xeneral y Grupos Parllamentarios, máximos dirixentes del Partíu Popular, IX-Bloque por Asturies y FSA-PSOE, partíos asturianistes, sindicatos, asociaciones culturales y etnográfiques, organizaciones de defensa de la llingua, empresarios.
El 5 de xunetu l'Academia daba razón, nuna rueda de prensa, del resultáu de los aconceyamientos. Sorrayábamos daquella que la Propuesta fora perbién acoyida pola mayoría de les instancies sociales consultaes y que, de toes elles, namái la Federación Socialista Asturiana (FSA-PSOE) mos tresmitiera la so imposibilidá de participar naquel entós nun alcuerdu consensuáu como'l que se plantegaba. Les sos dificultaes p'asumir la co-oficialidá de la llingua asturiana torgaron entamar darréu'l discutiniu al rodiu de los estremaos exes del Alcuerdu Social y Políticu sobre la Llingua y la Cultura d'Asturies.
Pero de lo que sí se pudo decatar otra vuelta l'Academia foi de que n'Asturies danse, ensin dulda, les condiciones básiques precises p'algamar el citáu alcuerdu. Poro, la Institución que presido quier dexar claro una vegada más el so determín de retomar la Propuesta, siempre que se dean les condiciones afayadices de diálogu y búsqueda de consensu.
Cuidamos que l'alcuerdu sigue siendo necesariu y, dende llueu, que la ufierta algama más actualiadá en cuantes qu'agora mesmo tan surdiendo estremaes iniciatives institucionales y partidaries, que tienen como finxu la reforma del Estatutu d'Autonomía d'Asturies y onde han inxertase les cuestiones llingüístiques y culturales.
Magar que de xuru sería bono que l'Academia diera cuenta percuriada a la sociedá asturiana de la xera desendolcada a lo llargo d'esti añu, ello fairía les mios pallabres llargues y pesaes enforma. Esta xera, siempre a disposición de toos, pue siguise peles caberes publicaciones de les numberoses coleiciones o revistes qu'espublizamos; o per otres actividaes como les Xornaes Internacionales d'Estudiu entamaes añalmente o l'Alcuentru Internacional 'Llingua Minoritaria y Educación' de convocatoria biañal.
Les comunicaciones y conferencies de les Xornaes espublícense davezu na revista Lletres Asturianes, qu'ameyora día a día la so calidá cientifica, lo que fai que tea nestos momentos catalogada ente les revistes filolóxiques de mayor altor del Estáu y que tenga la reconocencia de los organismos competentes d'ámbitu estatal ya internacional. Y pela so parte, Cultures y Lliteratura dan cuenta del llabor realizáu n'otres estayes non menos importantes.
Lo que sí quiero sorrayar son dellos finxos puntuales del nuesu facer que puen resultar más novedosos o tener mayor interés. Asina:
- L'asoleyamientu en 2006 del Estudiu sociollingüísticu de Lleón, que constitúi'l primer trabayu al rodiu de la identidá, conciencia d'usu y actitúes llingüístiques nes fasteres lleoneses del Dominiu Llingüísiticu Ástur más averaes a Asturies.
- La publicación del llibru Arabismos nel dominiu llingüísticu ástur, que ye hasta'l momentu l'estudiu más completu sobre'l léxicu asturianu d'esti orixe.
Éstos, xunto colos otros trabayos académicos, amuesen la imparable dinámica científica ya investigadora de la Institución.
- Hai que facer referencia, per otru llau, a una nueva coleición nomada Cartafueyos Normativos, que surde col enfotu de dar un reblagu más nel procesu normativizador, llueu de cumplíu'l trabayu más urxente nesti tarrén (Normes Ortográfiques, Gramática de la Lingua Asturiana, Diccionariu de la Llingua Asturiana (DALLA) y Nomes de Conceyos, Parroquies, Pueblos y Llugares del Principáu d'Asturies). L'Academia ye sabedora de qu'entá queda munchu camín por andar; de que por cuenta de la situación diglósica na que s'atopa llantáu l'idioma d'Asturies o de les prieses y urxencies coles qu'hai qu'actuar dacuando, non siempre se xeneren los modelos llingüísticos más axeitaos.
Poro, l'Academia tomó determín pa ufiertar unos materiales nuevos y práuticos que de xuru han collaborar na igua d'una escritura más amañosa; unos modelos de testos d'estremáu calter que valgan pa dar soluciones a problemes concretos de tolos díes y, al empar, pa dir enanchando les posibilidaes públiques de la llingua asturiana. Persabemos que nun son éstes les soles soluciones que se podríen afayar, pero tamos convencíos de que sí son una gabita importante pa, pasu ente pasu, dir dando rempuesta a les nueves necesidaes espresives del idioma.
Nesta nueva coleición tán yá espublizaos los númberos unu y dos. El primeru, de 2005, inxer los testos n'asturianu de dos testos llegales de referencia, la Constitución Española y l'Estatutu d'Autonomía del Principáu d'Asturies.
El segundu, acabante asoleyase col títulu Delles propuestes pa nomes de persona, ufre una propuesta que nin quier ser completa nin definitiva, pero que sí ye ñiciu de los nomes emplegaos polos homes y muyeres d'Asturies a lo llargo de los sieglos y agora.
El tercer cartafueyu, a puntu salir, dedicáu a La llingua asturiana na Alministración, quier ser un pegollu más nel procesu de la normativización y normalización social de la llingua asturiana. Nél conséñense, amás de dellos otros testos, toa una riestra de modelos normativos de documentos de los que los Conceyos, otres alministraciones y los propios ciudadanos empleguen davezu tolos díes. L'emplegu que se faiga de los mesmos formularios, de los mesmos modelos de documentos, sedrá ensin dulda un bon sofitu pal algame de una llingua xurídica y alministrativa afayadiza.
Tamién, ye pa min bien prestoso dar anuncia nesta Xunta Estraordinaria de dos proyeutos que xulgo perimportantes dientro del facer académicu de la Institución. El plenu de l'Academia dio'l preste nel so día pa que les Xornaes Internacionales d'Estudiu de los años 2007 y 2008 se conviertan en dos Conceyos Internacionales, que tán yá entamaos.
Trescurríos 5 años dende que se fizo'l I Conceyu Internacional de Lliteratura Asturiana y col enfotu de da-y continuidá, l'Academia xulgó afayadizo dedicar les Xornaes Internacionales d'Estudiu d'ochobre de 2007 al II Conceyu Internacional de Lliteratura Asturiana. Nesti Conceyu, baxo'l nome xeneral de «La lliteratura asturiana. Una mirada a lo llargo la so hestoria», faráse un recorríu sobro les caberes investigaciones feches nel tarrén lliterario y sobro cómo nos ven y cómo vemos la lliteratura asturiana de güei.
D'otru llau, teniendo en cuenta que nel añu 2008 van celebrase toa una riestra d'actos que nagüen, a xulgar pelo que se conoz agora y pel calter de los entamadores, por facer una revisión hestórica d'Asturies dende una llectura ayena al país asturianu, les Xornaes Internacionales d'esi añu 2008 dirán empobinaes a otru Conceyu Internacional sobre «La llingua asturiana, más de mil años nel país de los ástures».
Los estudios d'esti segundu Conceyu Internacional tendrán dos partes bien dixebraes. La primera tará dedicada a Estudios Históricos, con estayes como Del país de los ástures al Reinu de los ástures, El Reinu de los ástures nel norte, El Reinu de los ástures al sur o El desaniciu del Reinu ástur.
La segunda cincará a los Estudios Llingüísticos (y lliterarios) centraos na hestoria de la llingua asturiana medieval.
Pero'l llabor académicu nun torgó que l'Academia s'ocupare d'otres xeres sociales perimportantes, como les venceyaes a la tutela de los derechos llingüísticos de los asturianos y asturianes. Ehí ta tamién tolo rellacionao cola presencia de la llingua asturiana nos medios de comunicación. Nesti sen, la esmolición más fonda de l'ALLA ye la de la so presencia na televisión del Principáu d'Asturies.
Somos conscientes de que tamos delantre d'una oportunidá histórica, d'una ferramienta de primer orde pa la vertebración territorial, social y cultural d'Asturies; pa la recuperación, espardimientu, dignificación y normalización social de la llingua asturiana. Con esti enfotu caltuvimos xuntes colos dirixentes del Ente y con representantes del Conseyu d'Alministración de la RTPA (Radiotelevisión del Principáu d'Asturies) a los que ficimos llegar el nuesu posicionamientu y que podemos resumir, pa nun allargamos más, en que les dos llingües, l'asturiana y la castellana, han tener el mesmu tratamientu a tolos efeutos, porque ello ye de xusticia y ye lo que cualquier institución sensible a los enfotos democráticos y populares enxamás habría dexar de llau.
Y xustamente en rellación colos medios de comunicación nun quiero dexar de felicitar a Radio Sele pol so descomanáu llabor y trabayu a lo llargo d'estos venti años de dignificación del usu social de la llingua asturiana.
Tampoco nun escaecemos el vieyu tema pendiente de la presencia de la llingua asturiana na Universidá. Aconceyámonos colos responsables académicos y col Conseyeru d'Educación pa encadarmar los estudios de Filoloxía Asturiana, d'una manera afayadiza, dientro de los Títulos de Grau de Filoloxía y de Maxisteriu que se tán dibuxando agora nel Nuevu Espaciu Européu d'Educación Superior.
Aguardamos qu'esti esfuerzu, que la solidez de los argumentos manexaos y que les posibilidaes téuniques qu'abre la Converxencia Europea faigan posible que finalmente s'igüe esta llaceriosa situación, sobre too teniendo en cuenta qu'estes decisiones cinquen agora mesmo más a les autoridaes polítiques y universitaries d'Asturies qu'a los responsables educativos de Madrid. Dicho con otres palabres, y falando nidiamente, si ello nun se llograre yá nun se podría emplegar la recurrente xida d'echar les culpes a Madrid, sinón a la mala xestión o a la mala fe de les persones que dende Asturies habríen encontar estes hestóriques demandes.
Too ello solucionaríase dafechu cola reconocencia xurídica del estatus d'oficialidá de la llingua asturiana. Y ésta ye una reivindicación que l'Academia nun va a dexar enxamás, porque tamos convencíos de que ye l'únicu calce p'algamar una normalización seria, arreyada a la nuesa realidá, pa solucionar d'una vez tolos problemes del idioma ástur nes estremaes estayes de la enseñanza, pa garantizar una presencia xusta y digna de la llingua nos medios de comunicación, pa normalizar les rellaciones coles alministraciones y pa dexar de llau tantes y tantes llaceries como les que l'actual pautu de gobiernu, en materia de política llingüística, espeya na realidá asturiana de tolos díes.
Y al empar que reclamamos cola mayor firmeza de la que somos capaces esa reconocencia xurídica d'oficialidá, tenemos qu'amosar la tristura más doliosa y la esmolición más fonda ente aquelles postures que, diciéndose favoratibles a la recuperación de la llingua asturiana, renuncien de mano a siguir lluchando pola oficialidá, plantegando una nueva doctrina que dalgunos llamen "posibilista".
Esti posicionamientu posibilista, qu'a lo llargo d'esta llexislatura evidenció'l más rotundu fracasu (dende'l puntu de vista educativu, de presencia de la llingua nos ámbitos sociales ya institucionales, dende la incompetencia ya ineficacia nel tratamientu toponímicu, etc.) tresmite insensatamente la idea de que se pue algamar la normalización anque la llingua nun tenga validez xurídica y cuestiona, en definitiva, la estratexa y el facer de coleutivos y organizaciones como les que güei mesmo reclamen na cai'l derechu al emplegu de la llingua propia d'Asturies con reconocimientu llegal en tolos ámbitos y a tolos efeutos.
Pues, bien, nós queremos treslladar la nuesa solidaridá coles organizaciones y coleutivos sociales que siguen reclamando con enfotu'l llogru de la oficialidá. Y queremos retrucar tamién argumentalmente a dellos posibilistes qu'efeutivamente la cuestión plantégase ente'l tou o la nada: nós queremos el "tou" y ellos confórmense cola "nada".
Porque frente al posibilismu, l'Academia namái considera una única posibilidá: la oficialidá de la llingua hestórica del pueblu asturianu.
Y pa finar, dexáime que vos diga, a caún de vosotros, colos versos del poeta:

Nun tengas mieu,
que tou vive pa siempres
ya outra vuelta
vencerás na fiesta.
Outra vuelta sentirás la guapura
de la l.luz de la mañana.
.....
Ya you creo en ti
ya entós alcuentro de verdá la patria que buscaba,
más al.lá de la destrucción.
más al.lá de la memoria mía,
la plenitú de ser eternamente.

¿Puxa Asturies!

Por: eL trAsgU d´aRecEs | Llucha | Comentarios (0) | Referencias (0)