eL trAsgU d´aRecEs

Martes, 09 de mayo de 2006

ENTREVISTA A ASTURIES CIUDADANA

Mande-yos un e-mail a Asturies Ciudadana con delles entrugues d´interés sobre esta formación. Respondióme Nicolás V. Bardio, un coordinador d'Asturies Ciudadana, quíxome dexar nidiu que les sos respuestes nun representen a la totalidá de l´asociación "pues la so principal carauterística ye que ta abierta a tolos asturianistes que seyan radicales (nel sentíu de "Democracia Radical") y que tean cola xunidá". Espero que la entrevista seya del vuesu interés y gracies a Nicolas V. Bardio pol so tiempu y la so rapidez en contestame

____________________________________________________________


-¿Qué ye Asturies ciudadana y por qué ye necesaria?
Asturies Ciudadana ye una asociación asturianista (a seques, ensin más etiquetes), que quier desendolcar un papel de organización cívica política que n'Asturies nun esiste. Queremos non sólo presionar a los partíos asturianistes pa facer la coalición que pueda llevar al asturianismu a la Xunta Xeneral, sinon tamién facer propuestes d'iniciativa ciudadana, pues con 10.000 firmes se pue presentar una llei na Xunta Xeneral y hai abondes coses que podríen facese asina... Ehí ye onde pue entrar una asociación cívica comu ye A-C.
-¿Por que camentais que l´asturianismu políticu nun foi a algamar representación nes instituciones?
L'asturianismu ñecesita d'una renovación, non solu de llíderes políticos (que tamién), sinon de los programes, de les formes y los fondos... eso ye lo qu'amosaron les caberes elleiciones. Fai falta una renovación que namái pue venir de la mano de la xunidá, un discursu únicu, identitariu, soberanista ensin ser independentista (pa que podamos entrar toos) y abiertu a tol mundiu, non solu a los asturianistes de tola vida que somos esi porcentax que nunca nun llega al 5% nes socesives elleiciones.
-¿Quién vos prestaría qu´encabezara la coalición y como va ser el procesu pa escoyer a esa persona?
Esta ya ye una opinión mui personal de mio, pero yo creyo que la coalición tendría d'encabezala daquién que fore asturianista, de confianza y que nun tuviere munchos enemigos nel tarrén políticu... Hai que sacar a daquién del mundiu'l periodismu, del de la lliteratura, del académicu... o si acasu, de l'anonimatu de los asturianistes "non-relevantes", qu'a fin de cuentes somos mayoría.
Sobro'l procesu pa la elleición, yá espunximos el nuesu modelu de primaries: La cosa sedría instalar delles meses elleutorales per toa asturies con interventores de tolos partíos y candidatures, y que darréu se votare de forma abierta, esto quier dicir, que tolos ciudadanos asturianos de más de 18 años podríen votar nestes primaries faciendo un donativu d'a lo menos un euru ¿Por qué pagando? Pa evitar qu'a dalgún non-asturianista-y diere reventar les elleiciones y p'aidar a financiar la campaña elleutoral... 20.000 votantes nes elleiciones primaries, daríen a lo menos 20.000 euros, que pa financiar una campaña nun ye poco... Yo creyo qu'esta forma de democracia abierta, al traviés de primaries, a parte de ser novedosa n'Asturies, podría atrayer a munchos elleutores non ñecesariamente asturianistes hacia la nuesa causa.
-¿Llograreis el vuesu propósitu?¿que reaición veis na sociedá asturiana y nel asturianismu?
¿Llogralu? Nin depende de nós nin depende de los políticos, nesto hai que ser claros: Algamar esto depende de la ciudadanía asturiana, de toos y cadún de los homes y muyeres que formamos el movimientu asturiansita, depende de ti igual que de min y del que llea esto. Si la xente quier xunidá, tendránla, si nun la quieren, nun la tendrán... Y eso veráse nes firmes.
-¿Que-yos diríais a aquella xente que nun ta pola xuntura?
¿Pa convencelos? Que se paren a pensar un momentu en cómo'l que ta nel poder nunca nun ta dividíu: Ex: PSOE y la (agora desapaecía) Tercera Vía..., cuandu nun se ta nel poder hai divisiones internes Ex: PP y Problemes Ovidio-Morales-Gabino-Cascos etc. Y yá cuandu se ta na oposición estraparlamentaria de forma permanente, pásanos lo qu'a nós... AA+URAS+PAS+IAS nun sumen nin siquier el 5% de los votos, que son los qu'IU tien... Si queremos el poder pa tresformar Asturies, fai falta la xunidá, un nuevu proyeutu y formes innovadores de llegar a la xente... Nós creyemos qu'una "Refundación Asturianista", ye ñecesaria, pero bono, el que nun lo creya asina, ta nel so drechu de non creyelo y non firmar.

Por: eL trAsgU d´aRecEs | Caxigalines | Comentarios (0) | Referencias (0)