eL trAsgU d´aRecEs

Lunes, 15 de mayo de 2006

POSIBILISMU = CINISMU

Esta selmana “Les Noticies” incluye nes sos páxines un artículu de Ramón d´Andrés dedicáu a contestar a Ana Cano sobre´l tema del posibilismu. Pa entamar falar del mediu nel que sal asoleyáu; Les Noticies, l´únicu periódicu n´asturianu y col que l´ALLA finó toa relación, decisión nun del tou acertada pero comprensible, que toos sabemos les xoyes que-y dedicaben a la institución dende les columnes d´opinión y la so afitada posición galleguista, contraria de mano a tolos plantegamientos de l´academia. Daquella, y hasta agora, el selmanal nun dedicó nin una sola pallabra a dar nuncia o desplicar esti tema y ye nidiu qu´al producise un casu como esti´l mediu tendría que dicir daqué. Güeyando les páxines d´esta selmana pue vese que nun-y dediquen una sola llinia a falar del actu académicu y el discursu añal de la so presidenta col que los demás periódicos diarios asturianos abren les sos seiciones de cultura. Pero la cosa nun fina hai, la información sobre la manifestación pola oficialidá y el comunicáu de la Xunta apaez na páxina 16, na segunda páxina de la seición cultural Sieglu 21, amás de nun apaecer na portada. ¿Cómo pue un mediu que se noma asturianista nun abrir cola información de la manifestación pola oficialidá de la llingua na que ta escrito?. ¿Quiciabes ye porque ye más importante que Ramón d´Andrés y el Conseyeru d´Educación Riopedre, contrario a la oficialidá, presenten la campaña añal de matriculación a Llingua Asturiana?. Pa Les Noticies ye esta la información más importante de la selmana y non la manifestación polos drechos llingüísticos de los asturianos. Con esta noticia abren la seición d´actualidá. H.oder normal, con tolo que ta faciendo Ramón d´Andrés pola llingua, que gracies a él yá tamos más cerca de la oficialidá, como pue vese en toles declaraciones de los miembros de gobiernu. Por riba la mala-malísima de l'alloriada d´Ana Cano espotricando contra él y tolos discípulos bablistes garrando les escopetes pa dir a la caza posibilistes, los que se manifestaron de xuru que dempués foron al actu de l´ALLA y esos son como una secta. Yá ye hora de que Ramón d´Andrés pague-y un sueldu a los periodistes de Les Noticies que trabayen pa él más que la so secretaria de la Oficina de política llingüística. De xuru que l´añu que vien van subir un montón les sovenciones al selmanariu.

Y siguimos lleendo Les Noticies, a ver… páxina 8; ¡artículu de Ramón d´Andrés escontra d´Ana Cano!. Nel so artículu crítica les pallabres de la presidenta sobre´l posibilismu. Nel vien a dicir que l´academia perdio´l norte y que lo meyor ye facer lo que´l fai, trabayar pola llingua, que l´academia enxamás fizo tal cosa polo que se ve. Paez qu'a Ramonín da-y envidia nun ser el presidente de l´academia y facer un discursu delantre d´un teatru enllenu, pero pa eso ta Les Noticies, qu´él tamién tien los sos drechos, anque´l gobiernu al que pertenez ñegue drechos fundamentales. Pa nun perder más tiempu voi analizar dalgunes de les celebres y posibilistes frases d´Andrés sobre´l discursu d´Ana Cano;

“un ritual más dirixíu al micromundu asturianista qu´a la sociedá en xeneral, que desconoz les claves tribales de l´arenga”. Como bon miembru del gobiernu d´Andrés trata a la sociedá asturiano como fatos, los asturianos “normales” nun van ser capaces d´entender les pallabres de l´ALLA, menos mal que ta él pa desplicales.
“fabríquense a medida traidores virtuales, mui efectivos pa que la parte más fiel del públicu sepa daveres con quién hai que s´ensañar (…) pola probitú demagóxica de l´argumentación y pol efeutu encismador que tien dientro´l mundu asturianista”. Los peores somos los asturianistes que nun somos posibilistes y tamos d´alcuerdo cola ALLA, que ye´l llider de la secta, nos somos los satánicos siguidores que vamos dir a por ellos, los posibilistes, porque lo diz Ana Cano y nos nun somos quien a pensar solinos que l´academia fai tiempu que nos llabó´l cerebru.
“l´alusión a la negociación con Galicia, que me paez delirante”. ¿Quién foi a una xornaes en Ribadeo a les que l´ALLA, Xeira y la Xunta pola defensa de la llingua declinaron dir por considerar estes xornaes amuesa de l´espansionismu gallegu?
“si l´academia nun fueren posibilistes, renunciaba darréu al presupuestu añal que recibe del odiáu gobiernu y convertiriase coherentemente nuna ONG”. Col presupuestu probetayu que tienen más o menos siguirian faciendo los mesmo, solu val con ver la so sede, nun escaecer que los académicos nun reciben sueldu por selo y que la xente que trabaya pa l´academia trabaya ensin xacíu por un sueldu que nun compensa. Como bon miembru del gobiernu como quien nun quier la cosa diz lo munchu que cuesta la cosa esa del bable.
“dexaba (l´ALLA) d´apoyar la ordenanza municipal de Xixón, documentu posibilista onde los haya, que nun dedicaba un rispiu a la oficialidá”. Esti documentu lleva meses paráu pol gobiernu municipal yá que pa l´alcaldesa ye una oficialidá encubierta.
“aforraba (l´ALLA) de facer política apregonando una Propuesta d´Alcuerdu Social y Políticu sobro la llingua y la cultura d´Asturies (iniciativa onde, por cierto, fracasó dafechu, anque nun se presente asina ante l´auditoriu del Filarmónica)”. L´academia fai política por intentar salvar la llingua ante tantu posibilista que nun fai nada, el documentu si fracaso, pero por nun querer aceptar el PSOE la oficialidá, hasta´l PP acepto l´alcuerdu. Quien nun presenta les coses como son ye Ramonín que tan nun gobiernu llideráu por un partíu que foi quien fizo fracasar esti alcuerdu, polo que paez el fracasu d´un alcuedu pa salvar la llingua foi una allegría pal direutor de la oficina de política llingüística.
“¿en virtú de qué ecuanimidá se condena´l posibilismu pol que se llogren decretos d´oficialización nel BOPA, mientres s´empondera´l posibilismu d´un conveniu que l´Academia nagua firmar cola RTPA?”. Bien tán los decretos, pero nun valen pa nada si s´acumulen na mesa del Conseyu de Gobiernu y una vegada oficializados nun s´usen, ye siguir como tamos, nun avanzar. Yo tamién naguo por que l´academia firme esi conveniu del que fala, ello supondría que la RTPA va usar l´asturianu y que esti va ser un asturianu cultu con un calter normalizador.
“el problema pa dalgunos paez ser quién xestiona´l posibilismu disponible”. Si esa persona diz que les llingües d´Asturies son asturianu, castellán y gallegu (a seques) y ye´l encargáu de promocionar estes llingües sí.
“¿o en realidá´l problema ye que´l xefe de la OPLL, a pesar de la so disposición a dialogalo too, nun ye una persona controlada pol círculu dirixente de la institución?”. Que bono ye Ramonín, y eso que cuando dexo l´academia monto´l mayor espolín posible pa facéi´l máximu dañu posible a la institución.
“a min paezme que la llibertá de pensamientu y d´espresión nun ye solo una pancarta, sinón conceptos nos que fai falta creyer”. ¿Creye´l gobiernu al que pertenez d´Andrés nestos drechos?, quiciabes na llibertá d´espresión robando la llicencia a Radio Sele, agora ye l´academia quien ñega drechos fundamentales…

Tengo pernidiu qu'a Ramón d´Andrés prestaría-y facer munchu más de lo que-y dexen facer, pero tovía tengo más nidiu que´l posibilismu nun val pa nada. Posibilistes foron aquellos que renunciaron a la oficialidá por entrar nel gobiernu con tal de meyorar l´actual situación de la llingua nun pautu de gobiernu que nos presentaron y l´academia nun acepto al nun falar d´oficialidá, la mesma academia que tiempu dempués saco a la lluz un pautu, el de verdá, que llego a les sos manes y nun yera tan favoratible pa la llingua. El pautu que nos vendieron falaba ente delles coses de definir y desarrollar un plan de normalización con participación social ya institucional. Plan que nun se ta cumpliendo y que´l únicu que participo nél foi Ramón d´Andrés (y Areces pa quitar coses), amás de ser menos qu´una llei d´usu qu´afitaron que diben entamar a cumplir por primer vegada y enxamás desarrollaron. Pautu onde se falaba de sofitar la llicenciatura de Filoloxía asturiana y pel momentu la única persona que llucha por esta llicenciatura en Madrid ye Ana Cano como decana de la facultá de filoloxía d´Uviéu. Tamién falaben nes llinies del plan de garantizar del usu del asturianu nes relaciones de los ciudadanos cola alministración asturiana, ¿nun ye´l RIDEA un organismu de l´alministración?. ¿Nun se falaba de reconocer y sofitar a quienes trabayen pola llingua, sobremanera l´ALLA?, esti puntu nun merez nin comentarios. Nun dicíen tamién d´utilizar la RTPA como mediu de normalización de la llingua, ¿entós por qué nun pidíase conocimientos d´asturianu a los periodistes qu´opositaron?.

¿Camudo daqué?, sí, agora los políticos lleen una vez al añu testos n´asturianu nel parlamentu y Valledor visti dalguna vegada col traxe del país por encamientu de l´academia, ye lo que nos traxo´l posibilismu; munchu cinismu.

Por: eL trAsgU d´aRecEs | Opinión | Comentarios (0) | Referencias (0)