eL trAsgU d´aRecEs

Jueves, 18 de mayo de 2006

PRIMERES NOMINACIONES NA CASONA DE LOS BABLISTES

La nuesa presentadora lleendo les nominaciones

L´equipu de los vaqueiros y los aldeanos lleven un día de convivencia y Sonia Avellaneda, la nuesa presentadora (que nun ye Paula Vázquez en biquini nel Caribe pero ye nuesa y tamién tien el so puntu col traxe del país), enseño-yos a los dos equipos les normes del programa. Per un llau tolos participantes tendrán de dir vistíos col traxe del país a lo llargo de tou´l programa, lo que produxo la quexa de los académicos al ser tolos traxes iguales, yá que según l'equipu vaqueiru ye una falta respetu pa les variantes del traxe asturianu y nun se pue acabar coles variantes de la vistimenta asturiana yá qu'entós los asturianos nun se sentirán identificaos cola so forma de vistir. Per otru llau al informar al equipu aldeanu de la norma nel vistir los habitantes del horru dixeron qu´eso yera dir antroxaos y qu´ellos yeren mui serios, menos Valledor que yá traxo´l traxe puestu de casa. A la fin los dos equipos tuvieron qu´aceptar y acatar la norma.
La nuesa presentadora tamién-yos dio nuncia de les actividaes a les que tendrán que dedicase. Los vaqueiros van tener que sacar a pacer les xates y les oveyes y facer quesos y yogures cola so lleche, amás de facer xerseis cola llana de les oveyes. Demientres los aldeanos van tener que cuidar d´unes pites ponedores y tres pitos de caleya, amás de semar patates, berces y llechugues na güértina que tienen al llau del horru. Pablo Manzano amosó la so maestría pa catar les xates y punxo-y nomes y too a les oveyines. Nel equipu aldeanu Valledor tuvo problemes con ún pitu de caleya que ye mui bravu y confundió la so montera picona con una pita, Piquero qu´andaba per ellí tuvo fino y garro un cuchiellu y tarazo´l gargüelu del pitu, asina qu´esta nueche los aldeanos van celebrar l´entamu del concursu cocinando la pita con patatines de la so güerta y sidra, la única bebida que puen beber nel programa.

Pela tarde tuvieron qu´escoyer a los sos capitanes. L´equipu vaqueiru, como nun podría ser d´otru xeitu, escoyó a Ana Cano como la so capitana por unanimidá. Nel equipu aldeanu la cosa tuvo más reñida y surdieron les primeres rocees. Cuasi tolos participantes quixeron ofrecese como capitanes menos Piquero que yá tien abondo con guetar onde enchufar el so portátil pa ver que se cuez pelos foros asturianistes. Valledor sentenció que´l yera la persona más importante de los qu´habiten nel horru yá que´l yera un Conseyeru del Principáu, siendo retrucáu por Palacios qu´haber quien de toos tien más mundu visto. Pela so parte Bello salto que de políticos nada, qu´ellos yeren unos vendíos y que-y fueren llamber el culu a Tinín, amosando un llau radial desconocíu en Xuan Bello y entamando una fuerte engarradiella verbal que tuvo a puntu de llegar a les manes per parte de Bello y Palacios. Por suerte intermedio Ramón d´Andrés qu´ufiertóse como capitán al ser el que meyor conocía a los académicos, toos tuvieron d´alcuerdo y d´Andrés sedrá esta selmana´l capitán de los aldeanos.

Ana Cano interpretando la vaqueirada "Esti pandeiru que toco"

Llegada la nueche los concursantes dirixéronse al prau del tíu Xuacu onde se van celebrar toles pruebes del programa. Sonia Avellaneda anuncio-yos la primer prueba; los capitanes de los equipos interpretarien un cantar tradicional asturianu. Ana Cano decidióse pola vaqueirada “Esti pandeiru que toco”, lo que-yos molesto muncho al otru equipu al llegar la estrofa onde diz “los vaqueiros son vaqueiros ellos mesmos lo xuraron y vale más un vaqueiru que venticinco aldeanos, olé, olé, olé y olé, más quiero ser de la braña y que me llamen vaqueira que ser de la marina y que me llamen sardineira…”. Llegáu´l turnu de los aldeanos prodúxose un problema onde tuvo qu´intervenir la presentadora del programa al querer Ramón d´Andrés, enfadáu abondo pol xeitu que-y punxo la Cano nes frases citaes, interpretar la “Rianxeira” como canción asturiana, él afitó que n´Asturies fálase gallegu asina que si esti yera un cantar en gallegu yera tamién un cantar d´Asturies. Sonia Avellaneda consulto a la direición del programa que-y alvirtió a d´Andrés que tendría que facer la so interpretación n´asturianu, esti ñegóse resultando entós ganadores l´equipu d´académicos y asina llibrándose de tener que nominar.
Nes nominaciones pudiéronse ver les rocees llatentes ente los aldeanos. Xuan Bello nominó a Piquero yá que nun ve normal qu´un escritor reconocíu internacionalmente, según dixo, tenga que compartir fueya nes Noticies con Piquero y que por riba esti tuviera más espaciu. Ramón d´Andrés tamién nominó a Piquero yá que según el nunca facía nada y yera un aburríu. Mientres tantu´l propiu Piquero nominó a Palacios yá que nun dexaba de cunta-y les sos batallines pel mundu y yá taba farto. El propiu Palacios nominó a Valledor por que dixo que yera muncho de boquina pero dempués facía lo que-y mandaben. L´últimu en nominar foi Valledor que devolvió-y la xugada a Palacios nominándolu, dando la razón de que nun miraba polos intereses de toos sinón polos suyos propios.
Asina que los nominaos d´esta selmana son estos;


José L. Piquero


Rafa Palacios

Les tos votaciones decidirán quien será l´espulsáu. El próximu xueves ún yá nun tará nel horru de los aldeanos,tu decides…

Por: eL trAsgU d´aRecEs | La Casona de los Bablistes | Comentarios (4) | Referencias (0)