eL trAsgU d´aRecEs

Lunes, 22 de mayo de 2006

EL MEYOR CANTAR N´ASTURIANU DE TOLOS TIEMPOS

Hai 20 años de rock n´asturianu ente esta imaxen y les que vienen darréu

LA DANZA

Dicen que yo t'invento
llingua por mi nomada,
como s'inventa la rosa,
rosa namái na pallabra.
Dicen que la voz perpura
de los vaqueiros d'alzada,
fíxose dafechu muda
cuando baxó de la braña.
Que tol verdor d'Asturies
xorrez con flor castellana,
que me quedé ensin paisanos
que m'entonen la tonada.
Qu'estos montes, qu'estos valles
per onde la vida pasa
t´entallaren callandino
pa nun sacate de casa.
Dicen que yo t'invento
llingua por mi nomada,
porque te preño la lluz
que t'escluco na ventana.
Dicen que yo t'invento
porque te saco de casa,
y fáigome faladeru
cuntando... lo que nos pasa





Esti ye´l meyor cantar n´asturianu de tolos tiempos según les vueses opiniones. Amás, ensin dubia, DIXEBRA ye tamién el grupu que más mos presta, bono, ¿daquién duldábalo?. La lletra d´esti cantar garrola´l grupu del llibru de Manuel Asur "Cancios y Poemes pa un Riscar", el primer llibru n´asturianu del Surdimientu asoleyáu en 1977, un llibru hestóricu de la lliteratura moderna n´asturianu, más polo que significó que pol so valir lliterariu. El grupu tien versionáu tamién el poema "Asturcón" del mesmu autor. Asina quedaron les votaciones;

Grupos más votaos;

1: DIXEBRA; 8 votos
2: LLAN DE CUBEL; 3 votos
3: NUBERU; 2 votos
4: La Col.la Propinde, Skama la Rede, Skanda y Felpeyu; 1 votu caún

Cantares más votaos;

1: LA DANZA; 3 votos
2: NESTI MUNDIU TRAIDOR; 2 votos
3: MAÑANA FRÍA; 2 votos



Y ye que llevar 20 años faciendo rock n´asturianu dexa pegada na mocedá, gracies a ellos muncha xente averóse al asturianu, dende equí un pequeñu homenax a esti grupu al que tanto fizo pola normalización llingüística.


¡¡¡Xune yes mui grande!!!

Un 6 de xineru del 87 unos mozos xuntáronse pa facer musica n´asturianu. Asina ñació DIXEBRA, dende aquella y hasta güei´l grupu dio conciertos per toa Asturies y tamién n'otros países (Galiza, Euskal Herría, Cantabria, Castiella, Aragón, Paisos Catalans, Bretaña...) y dexáronnos 8 discos; "Grie-ska" (FonoAstur), "¿Asturies o trabayes?" (L'Aguañaz 1993), "Apuntate a la llista" (L'Aguañaz 1995), "Dieron en duru" (L'Aguañaz 1997), "Glaya un pai's" (L'Aguañaz 2000), “Sube la marea” (L’Aguañaz 2002). Nel añu 2004 editaron un recopilatoriu con versiones y remezcles d'una esbilla del so repertoriu, "Cróniques d'un pueblu", acompañáu d'un llibru que resume los sos 17 años de vida. L'últimu trabayu discográficu hasta'l momentu ye "Ensin novedá" (L'Aguañaz 2005). A lo llargo d´estos 20 años amosaron una evolución ensin precedentes na música asturiana qu´amás foi puntu de partida de la escena del rock astur (Avientu, Skama la Rede, Skontra…). Dende los sos entamos Dixebra siempre amosó un compromisu innegable cola llingua y la llucha del pueblu asturianu polos sos drechos. Con dellos cambios na so hestoria, anguaño la formación de DIXEBRA tá formada por: Primi Abella (guitarra), Javi Rodríguez (baxu), Jorge Cambareli (batería), Fernando Rubio (gaita), Xune Elipe (voz), Agustín Lara (trompeta), Eladio Díaz (saxo) y Sergio Rodríguez (soníu y samplers).


Cartelu del próximu conciertu del 20 aniversariu

Recordái que´l próximu 3 de Xunu Dixebra celebrará´l so 20 aniversariu na Plaza´l Parche d´Avilés grabando'l so primer discu-DVD en direutu, disfrutái vosotros que podéis, qu'esta lleenda urbana tá d´esámenes y va perdese´l que pue ser el meyor conciertu del so grupu favoritu (gracies Tinín). Menos mal que me queden los sos 8 discos pa escuchar hasta qu´en navidá saquen esti discu-DVD.

Por: eL trAsgU d´aRecEs | Música | Comentarios (1) | Referencias (0)