eL trAsgU d´aRecEs

Jueves, 25 de mayo de 2006

25 DE MAYU; l´auténticu día de la nación asturiana

Fai 198 años l´Estáu taba ocupáu poles fuercies napoleóniques y colos reyes españoles en Francia. Un 25 de mayu de 1808 la Xunta Xeneral, afitando qu´esta institución yera anterior a la monarquía española y que polo tanto ensin un rei recuperaba los sos drechos históricos, declaróse soberana y empobinó embaxadores a Gran Bretaña. Güei merez la pena recordar unes pallabres que siguen teniendo la mesma validez 27 años dempués.

(esti testu ye parte del manifiestu lleíu per Conceyu Bable na Plaza la Catedral d´Uviéu nuna concentración autonomista delantre representantes de la mayoría les fuerces polítiques asitiaes n´Asturies, el 25 de mayu de 1979)



…El pueblu asturianu, dominau pel centralismu, nun ye´l dueñu de la riqueza y pa dir llogrando daqué d´esi control necesariu fai-se peremportante´l llogru del control políticu. Pero un control políticu dafechu y non una ximuestra. Non una engañifa más. Y si digo esto ye pel peligru que corremos que mos dean una autonomía de segunda categoría. En realidá esi peligru tá na Costitución cuando fala de nacionalidaes y rexones. Les primeres tán siendo reconocíes como pueblos dafechu. Les segundes si nun s´entína non.

Qué somos nosotros? Somos nacionalidá? Les nacionalaes quién son, Cataluña, Galicia, País Vascu y… esa Castilla qu´arrecueye tolo que nun ye nin Cataluña, nin Galicia, nin País Vascu? Entós nosotros qué somos? Una rexón de la nacionalidá castellana?
Nun mos faer rir.

La nacionalidá ye la llingua? tenémosla.
La nacionalidá ye´l sentir colectivu? Tenémos-lu.
La nacionalidá ye la hestoria? Tenémos-la.
La nacionalidá ye la comunidá de producción y economía? Tenémos-lo.

Si. Somos una nacionalidá histórica. La primera porque´n Cuadonga si daqué nació nun fon na más qu´Asturies. Dícen-lo asina les cróniques “Escoyeron a Pelayu Rei de los ástures”. Si en Cuadonga nació dalguna nación, esa fo la nación asturiana.

Asina que dende´l mesmu momentu que´l primer testu llegal, la Costitución, fai esa dixebra ente nacionalidaes y rexones ye antasturiano nun dexar abiertes les puertes a les mayores posibilidaes pal nuesu pueblu. Eso ente nosotros negó-se abondes vegaes. Otros quixeron tracamundia-lo, callá-lo, maya-lo. Equí, el dominaor fo más llistu, más ardizosu. Equí l´alienación hestórica calistró más fondo. L´alienación cultural y política asturiana llegó a nega-mos el drechu a esistir como pueblu. Esborró, o quixo llogra-lo, la nuesa identidá coletiva. La nuesa alienación fixo que mos burlláremos de nosotros mesmos y de les nueses coses. Fixo qu´aplaudiéramos lo de los otros y mos diere vergoña lo nueso. Fixo que fueren verdá les pallabres del poeta:

“Asturies quedando fo callandina
como ensin alcordanza
y ensin alcordanza un pueblu
nun tien futuru a la llarga”
…

Por: eL trAsgU d´aRecEs | Llucha | Comentarios (0) | Referencias (0)