eL trAsgU d´aRecEs

Miércoles, 31 de mayo de 2006

N´AST

TÍTULU; OBRES INÉDITES (Aviaes y anotaes por C. Rubiera y R. d´Andrés)
AUTOR; ANDRÉS SOLAR
EDITORIAL; ACADEMIA DE LA LLINGUA ASTURIANA
COLEICIÓN; LLIBRERÍA ACADÉMICA, nº 5
EDICIÓN; 2004 (2ª edición)



Con esti artículu entamo una seición nomada N´ast pa recomendavos tolos discos y llibros que me presten. Y el primer llibru que voi recomendavos nun podría ser d´otru que del mio escritor favoritu; Andrés Solar. Un escritor que prometía muncho hasta qu´un accidente de coche dexónos ensin un de los meyores autores de Surdimientu. Andrés Solar nun tevo tiempu de llegar a escribir una novela, fizo un intentu de novela pero namás que foi a entrellazar dellos cuentos escritos caún pel so llau a traviés d´una hestoria paralela que los fora xuntando, namás pudo llegar a una xenial novela curtia titulada “Il grillo di ali bianche”, onde una comunidá de vecinos comparte un grillu d´esnales blanques que creyen máxicu. La so obra son fundamentalmente cuentos y poemes. Per un llau unos cuentos centraos xeneralmente nun mundu rural, pero esi mundu rural ta totalmente alloñáu del costumbrismu y de la imaxe bucólica de l´aldea de la lliteratura tradicional, Andrés Solar escribe del mundu rural onde vivió y crióse. L´escritor valse fundamentalmente de neños pa falar de los sos pruyimientos y d´un mundu ensin maldá (l´infantil) que ye violáu pola xente adulta (“Cuentos de neños con mala hostia”). Andrés Solar tamién valióse de la critica social pasada pol filtru del sarcasmu más asturianu nel cuentu “Nel chigre Asturias”, onde dellos personaxes falando nun chigre sirven-y a l´autor pa facer un repasu pela situación del país.

Quiciabes el xéneru onde Solar meyor foi a tresmitinos les sos idees foi a traviés de la poesía, pa ello utilizó dende la poesía reivindicativa (“Un pueblu”), la poesía romántica (“Déxame viaxar contigo”) o la traducción (el perconocíu poema de Neruda “gústesme cuando calles porque tas como ausente…”). La poesía d´Andrés Solar sigui teniendo la mesma vixencia 12 años dempués de la so muerte, preba d´ello ye que'l rock ástur yá fizo versiones de dellos poemes suyos. ¿Dalguna vegada falto nun conciertu de Dixebra “Pallabres Vieyes”?, ¿nun ye “Hai que siguir” un de los meyores cantares de Skama la Rede?. Son lletres de poemes d´Andrés Solar. La xenialidá d´esti autor foi reconocía pola propia Conseyería de Cultura dedicando-y´l día de les lletres asturianes del añu 2004, amás la Xunta pola defensa de la llingua entrega cada añu unos premios que reciben el nome del autor. ¿Dalgún motivu más pa que corráis a la llibrería a guetar les “Obres inédites” d´un de los meyores autores de la lliteratura asturiana?.

Por: eL trAsgU d´aRecEs | N´ast | Comentarios (0) | Referencias (0)