eL trAsgU d´aRecEs

Viernes, 09 de junio de 2006

LA TPA ENTAMA A EMITIR INFORMATIVOS (en castellán...)

20h30 TPA Noticias
21h00 El Tiempo
21h03 TPA Deportes
21h23 El cuenta cuentos: Lena y la carrera
21h26 Asesinato 1,2,3 . 2002. Barbet Schroeder.
NO RECOM. MENORES DE 18 AÑOS
23h00 Fin de Emisión

Güei la TPA emitirá´l so primer informativu, será a les 20.30 y tará presentáu polos periodistes Cristóbal Ruitiña y Diana Sánchez. L´informativu va ser el puntu de partida d´una programación continuada de producción propia, amás de los partíos de fútbol que yá se taben emitiendo. L´informativu será en castellán, como paez que va ser la mayoría de la programación, y de xuru que nin de forma simbólica van utilizar l´asturianu nel primer informativu de la hestoria de la televisión pública d´Asturies. Nun voi falar equí del serviciu que-y pue, y va, facer al Principáu manipulando y tracamundiando la información en bien de los intereses de la FSA, o quién tea. Pero polo menos esperaré a velo, pero ye nidiu qu'esi primer informativu dirános abondo de cómo va ser la televisión asturiana.

Dempués d´añu y mediu de creación de la RTPA y de 6 meses d´emisión en prebes de la televisión nun sabemos un res de que tratu van dar a la llingua na TPA, namás qu´habrá ún programa infantil diariu de 15 minutos. Si van utilizar la llingua namás que de forma simbólica, si van entamar colo que se puea n´asturianu pa dir medrando o si van curiar el calter normalizador que tien, por llei, que cumplir l´ente. Nun hai respuesta; nun saben, nun contesten. Too paez indicar que va ser namás que lo primeru, una presencia simbólica, pa poder dicir que polo menos faen daqué, igual un programín al día de nun más de media hora pa falar del asturianu o del nuesu folclor, la TPA tien que tener programes d´esti calter y taría perbien qu´entamaran cursinos d´asturianu pela televisión, pero asina namás nun se normaliza una llingua nos medios de comunicación. Ye nidiu que na TPA, por nun sabemos cuanto tiempu, nun vamos poder sentir el partíu del Sporting n´asturianu, ver a Shin-Chan o a Marilyn Monroe falando n´asturianu y que nos despliquen como tá la situación n´Irak o como va´l trespasu de les competencies de xusticia na nuesa llingua, como puen facer anguaño, en mayor o menor midida, vascos, gallegos, catalanes, valencianos y baleares.

Sería lo xusto y razonable tener polo menos un canal dafechamente n´asturianu pero ye persabiu que pel momentu ye imposible una televisión 100 % n´asturianu, anque en tantu tiempu que tuvieron poniendo en marcha l´ente dio-yos tiempu a facer doblaxes y preparar abondos periodistes si quixeren. Quiciabes lo meyor sería entamar pocu a pocu pa que la xente fora avezándose a sentir películes, informativos y magazines n´asturianu, pero pocu a pocu nun quier dicir en 20 años. Lo meyor sería emitir dalguna película doblada´l asturianu a la selmana, si se pue, que tampoco ye bono facer una mierda de doblaxe de “Casablanca” o “Matrix” pa que la xente namás que lo vea pa mexase de la risa. Un informativu diariu n´asturianu, dalgún programa d´alderique o entrevistes y una programación infantil diaria, esta si, integramente n´asturianu, la mayor y meyor midida normalizadora. Y a partir d´equí dir medrando hasta llegar a una televisión billingüe onde la llingua vehicular na que tien qu´espesase´l mediu seya l´asturianu

Una bona idea pa entamar sería facer una versión n´asturianu del programa “Cifres y lletres” qu´anguaño emítese en castellán per TeleMadrid y en gallegu pela TVG. Amás el programa regala a los concursantes que pierden llibros, que nel nuesu casu tendríen que ser n´asturianu. Un programa como esti sería una bona forma d´entretener n´asturianu y de pasu deprender asturianu dempués de xintar o cenar. Tamién sería bono un musical n´asturianu onde puean actuar dende una banda de gaites, un cantante de tonada o un grupu de rock (pa que tamién puea interesar a la mocedá), tamién amestando nel programa dalguna seición d´humor o un monólogu tradicional, que nun seya insultante pa dalgún sector de la sociedá qu´hai caún y tamos nuna televisión pública. Home, esti nun ye precisamente un programa cultural, anque pue facese con calidá, y qu´a min mesmu nun me prestaría ver, pero de xuru que tendría audiencia y la nuesa llingua fai muncho que pierde audiencia. Amás de ser un campu (la tonada y el monólogu tradicional) al traviés del cual la nuesa llingua mantúvose viva y coneuto col públicu a lo llargo de los sieglos, sería bono modernizalo y llevalo agora´l gran públicu a traviés d´un mass media.

Hai muncho que se pue facer na RTPA n´asturianu y destináu a un públicu mayoritariu. Llastima que quieren facer tolo contrariu; en castellán y programes n´asturianu pa un públicu minoritariu (non pola llingua, sinón pol so conteníu). Güei ye un día hestóricu pal audiovisual asturianu, llastima que seya tolo contrariu pal asturianu, a seques.

Por: eL trAsgU d´aRecEs | TeleTini | Comentarios (3) | Referencias (0)