eL trAsgU d´aRecEs

Martes, 13 de junio de 2006

4 DÍES D´EMISIÓN Y DE VERGUENZA AYENA

Como futuru periodista que quiero llegar a ser llevo años esperando poder ver una televisión pública asturiana que normalizara, ensin meteme yá en porcentaxes d´emisión, la nuesa llingua y que cuando llegara esi momentu y viera esi canal suañar nún futuru trabayando nella y faciéndolo n´asturianu, pero esto ye Asturies. 4 díes d´emisión y yá sabemos que lo de la TPA ye de vergüenza, que nun ye que TeleTini nun vaya normalizar l´asturianu sinón que va tar escontra l´asturianu. Preba d´ello ye lo de “Presta Asgaya”, esi programa que ficiéronnos creyer que sería n´asturianu. Pa entamar el nome; la espresión correcha ye “presta a esgaya”, si yá ponen mal el títulu d´un programa y nun s´informan de cómo ye la normativa que vamos poder esperar de lo poco qu´emitan n´asturianu. Y pa siguir el conteníu del programa; cuentos tradicionales asturianos representaos por personaxes de la mitoloxía ástur, que yo sepa los cuentos tradicionales asturianos que tresmitiéronse de güelos a nietos siempre foron na llingua tradicional d´Asturies, agora gracies a una televisión que vémonos obligaos a pagar tolos asturianos la llingua de la tradición ye´l castellán, amuesa de que TeleTini va ser el mayor elementu d´aculturación del nuesu país. Y daqué que m´esmolez enforma; ¿dende cuando los personaxes mitolóxicos falamos en castellán?, como trasgu siéntome ofendíu.

Fai meses lleí en Les Noticies una entrevista a un conseyeru de la TPA y dicía que se taben preparando tres programes n´asturianu; un infantil y dos magazines. Cuando lleí en La Voz de Asturias qu'Ornia falaba d´un infantil diariu de 15 minutos col títulu de “Presta Asgaya” creyí, como munchos, qu´esti yera ún de los programes n´asturianu. La verdá que d´aquella foi prestoso, polo menos diba haber daqué tolos díes n´asturianu (a vegaes tamién soi posibilista) y hasta imaxinaba que quiciabes yera posible que tola programación infantil fora n´asturianu, que per ún llau sería un importantísimu elementu normalizador y per otru xeneraría emplegu nel sector del doblaxe coles series d´animación. Agora viendo la futura parrilla de programación (infantil a les 18 hores, Asturias directo a les 19, informativu y dempués un magazín d´actualidá siguío d´un magazín llixeru, esto toles díes de llunes a vienres) ye lo más probable que de llunes a vienres nun haya dengún programa n´asturianu teniendo en cunta que´l prime-time tará ocupáu siempre pol mesmu magazín y que TeleTini nun ta por facer un programa diariu, nin en prime-time nin en horariu de tarde, n´asturianu. Tamién falaben los periódicos fai selmanes d´un documental sobre la música asturiana nos caberos 20 años, na información del periódicu falaben de dellos grupos, toos cantaben en castellán o inglés, Dixebra y Los Berrones paez que nun son hestoria de la nuesa música. Amás dicíen que dexaben d´un llau al folck ¿será porqué ye´l xéneru más importante de la música asturiana amás d´espresase únicamente n´asturianu?



Y colos pocos díes que llevan d´emisión yá podemos falar de manipulación, y tovía más preocupante ye cuando la manipulación prodúxose nel primer informativu; na inauguración del Acuariu de Xixón demientres los trabayadores del naval manifestábense una redactora de TeleTini entrevisto a René Rodríguez, secretariu del Comité d´Empresa por CCOO, la trabayadora Berta Álvarez y Cándido González Carnero, dirixente de la Corriente Sindical d´Izquierdes. Pero esa entrevista non foi emitída nel primer informativu de la hestoria de la TPA, la cosa promete…

Como asturianu dame vergüenza que la que tendría que ser nuesa televisión seya too menos nuesa. Tovía más comparada coles demás televisiones publiques de comunidaes billingües; per un llau TVC en Catalunya, con tres canales de tv; ún xeneralista, ún xuvenil ya infantil y ún de noticies, toos en catalán. TVC caracterízase pola so calidá (nin un minutu d´información rosa al día) y por tener la máxima audiencia en Catalunya, amás de ser considerada una de les meyores televisiones europees, mui por riba de TVE anque con muncho menos presupuestu. Llueu ta ETB n´Euskal Herria, con dos canales, ún n´euskara y otru en castellán. El primeru carauterízase pola apuesta pola tradición (deportes, música, lliteratura…) y la programación infantil, demientres que n´ETB-2 prima la producción ayena y l´entretenimientu. La pega a esti canal, el que ye n´euskara, quiciabes sería que ye mui minoritariu (nun llega al 10 % d´audiencia), anque hai abondos programes d´entretenimientu y reality-shows n´euskara, hasta hai ún que yera bono versionar pa TeleTini nel que varies persones que nun dominen l´euskara conviven nuna escuela deprendiendo la llingua del país. Dempués ta la TVG, demientres munchos años una televisión destinada a los votantes del PP-G, xente mayor y d´aldea, onde nun había una apuesta polo propio y destacaben musicales onde Isabel Pantoja y Manolo Escobar yeren les máximes estrelles y solo diben orquestes gallegues y bandes de gaites pa rellenar, quiciabes dalgún grupu de folck de vez en cuando pero nada de rock reivindicativu en gallegu (lo que pasará de xuru en TeleTini, muncho Hevia y Tejedor pero nun esperéis ver a Dixebra na vida). Esti canal destaca pola so apuesta pol audiovisual gallegu con teleseries de calidá que llograron desendolcar en Galiza una importante industria audiovisual. Col cambiu de gobiernu paez que la TVG entama, selemente, a camudar. Polo que siempre se destaca esti canal foi por emitir tola so programación en gallegu y, a pesar de la manipulación nos informativos y ser un canal del que la mocedá fuxía, ser reconocíu como l´elementu que más contribuyó a la normalización de la llingua de Galiza (amás de la galleguización del occidente asturianu). Dempués tan Canal 9 nel País Valenciá y IB3 nes Illes Balears, canales que marxinan el catalán nel prime-time y con una manipulación nos informativos que nin se molesten en disimular. Pero la TPA ta mui lloñe d´elles, y pa mal. Estes serán tolo que quieras y emitirán programes-basoria como “Tómbola”, pero los informativos y los programes infantiles son dafechamente en catalán, amás d´una parte importante de la so programación anque non nos horarios de máxima audiencia. Enxamás pensé que diba preferir una televisión como Canal 9 p´Asturies (polo menos nel tema llingüísticu tamos a años lluz y eso que los sectores catalanistes tán igual d´esmolecíos que nosotros pol tratu a la llingua propia na so televisión). La nuesa paez que polo menos nún quier competir n´audiencia, anque ye nidiu que nos entamos nun se pue permitir competir, y que va primar la calidá y el serviciu públicu. Val bien, ¿pero será verdá?. Dixeran tamién que TeleTini diba normalizar l´asturianu.

Por: eL trAsgU d´aRecEs | TeleTini | Comentarios (3) | Referencias (0)