eL trAsgU d´aRecEs

Sábado, 24 de junio de 2006

IGOR MEDIO, CARLOS BLANCO; TA SIEMPRE

La música y les pallabres nun muerren, queden equí pa siempre, guardaes na memoria d´un país y dando-y vida demientres haya un pueblu que sepa da-yos alientu y puxu, faciéndonos recordar con arguyu lo que somos y con rabiura lo que nun mos dexen ser. Pa que nun escaezamos qu´hai que siguir, que nada dan de baldre, que la llucha a vegaes ye derrota, pero ensin lluchar quiciabes nun merez la pena abrir los güeyos cada mañana, sentir que tas vivu y que pues esnalar y suañar. Salir a la cai glayando la verdá. Porque lo bono enxamás muerre y tovía hai muncho camín, pero yá ta marcáu.

Nunca foi tan murnia l'alborada de San Xuan.

Tierra

Na flor de la cerezal
que priende la primavera.
Nel cantar de los carbayos
y nel vientu que lu lleva.

Nel llagu de los tos güeyos
au fai remolín el tiempu.
Nos pegollos que sostienen
colleches d'amor y empeñu.

Nellos poso'l corazón,
nellos pongo la esperanza,
la grana azul del futuru
y la flor de l'acordanza.

Nel agua de los regueros,
del borrín y de la prúa.
Na esencia del alicorniu
Nel creciente de la lluna.

Nes tierres de pan. Nes sebes
de malvises y raitanes.
Na voz escura del monte.
Na voz antigua del sangre.

Nellos poso'l corazón,
nellos pongo la esperanza,
la grana azul del futuru
y la flor de l'acordanza.

Nos altos picos que vuelen
los airones y les ailes.
Nel secretu que la mar
guarda en roncheles y playes.

Nel ciernu de la memoria.
Nes ferramientes gastaes.
Nes palabres que ñacienon
cabo'l fueu de vieyos llares.

Nellos poso'l corazón,
nellos pongo la esperanza,
la grana azul del futuru
y la flor de l'acordanza.

Por: eL trAsgU d´aRecEs | Caxigalines | Comentarios (1) | Referencias (0)