eL trAsgU d´aRecEs

Lunes, 03 de julio de 2006

PALLABRES DENDE´L MIO PAÍS

Estes pallabres que toi escribiendo, y qu´espero que daquién llea, yá tan escrites dende´l mio país, dende la mio casa. Facía mes y mediu que nun pisaba Asturies y dende Euskal Herria esos díes multiplicábense y multiplicábense asemeyando que cada día quedaba más lloñe´l momentu de tornar, pero al entrar l´Alsa (esa compañía de tresportes que tan bien-y vien qu´Asturies seya una fabrica de llendes urbanes) na estación d´Uviéu paecía que namás que tuviera un fin de selmana fuera, daqué tien el sitiu al que perteneces, el que siempre ta ehí pa que vuelvas, que pasen díes, meses o años y cuando regreses paez que foi ayeri cuando colasti pela puerta, cuando entamasti a contar los díes que quedaben pa tornar al to llar.

Queda abondo branu per delantre y munches folixes colos collacios por disfrutar, de momentu la primera foi´l sábadu pasáu en Cuideiru y too paez indicar que les fiestes de Lluanco van ser les próximes, anque paez qu´igual caye una n´Uviéu nel mediu qu´hai quien tovía nun finó los esámenes y nun quier esperar al fin de selmana p'afogar la necesidá de folixa dempués de dos meses d'astinencia de sustancies prohibíes y d´usos restrinxíos, música-basoria al altu la lleva y golor a sudu y fumu de tabacu. Polo menos hasta´l Sanmateo d´Uviéu hai muncho por disfrutar; el xiringüelu, la nueche celta de Candas, el Sanagustín y l´intercélticu na mio ciudá, Begoña en Xixón… y quien sabe si cualesquier día, ensin que seya fin de selmana nin nenguna folixa señalada, dempués d´una sidra caiga otra, yá que tamos que´l chigreru nun faiga´l viaxe de baldre y que traiga yá dos de pasu y sabe Dios que vendrá dempués y entós pue qu´ensin tenelo pensáu seya´l meyor día de tol branu.

Hai momentos que faen que la vida valga la pena y presten muncho más cuando nun tán previstos, cuando tas colos tos collacios y cuando sientes que tas na to casa, nel to país, cuando nun hai priesa y tienes tol branu y paez que tola vida por delantre. Polo menos hasta que nun entames a estudiar les que dexasti pa setiembre, pero tovía ye ceo, setiembre paez tan lloñe…

Por: eL trAsgU d´aRecEs | Opinión | Comentarios (1) | Referencias (0)