eL trAsgU d´aRecEs

Lunes, 03 de julio de 2006

SOBRE LOS BLOGS N´ASTURIANU

L´escritor Xandru Fernández fai dende la so columna Rexilando en “Les Noticies” un repasu a la comunidá de blogs n´asturianu. Cada blogueru podrá tar mas o menos d´alcuerdu colo que-y toca, pero la verdá que dir el vienres al quioscu y topame con esti artículu, pa que negalo, prestóme. Dende equí facer un llamamientu a los blogueros del país pa topar un nome pa la nuesa ciber-comunidá. Hai quien fala de bloguines y tamién quien se refier a los asturblogs, pero nun hai un nome de consensu como yá tienen, por exemplu, los gallegos colos sos blogmillos. Equí déxovos l´artículu de Xandru Fernández y a ver si damos col nome afayadizu pa la nuesa comunidá.
____________________________________________________________

BLOGS

L´universu blogger fala n´asturianu: otra conquista que los sabios de provincies nun van ser quien a valtar, cuantimás cuando, pa les proclamaes élites asturianes, el ciberespaciu nun tien esistencia nin importancia. Xente mui nuevo, mui activo, mui cabreao tamién, la que ta detrás d´eses bitácoras, dedicando-yos un tiempu robáu a los exámenes, los ligues, les folixes y otres causes más nobles. Un paséu pel frescor del asturianismu menos contamináu.

El viaxeru pue entamar pel reinu d´EL TRASGU D´ARECES, onde se mecen reflexones al aldu con noticies d´esti país de mures y onde s´agospió esta primavera´l divertíu serial “La casona de los bablistes”. D´ehí atravesamos “La Maeda”, xardín a cargu del incombustible Prospero Morán, incuestionable pioneru nesta estaya. Facemos un altu na campera “Xabel diz”, pródigu n´hipervínculos y d´un gustu impecable, al mio modestu entender. Y yá por nun nos salir d´esi estilu, aportamos al poéticu portal de “Les muyeres con paxellu”. Podemos dende ehí, garrar aire pa la señardá y asomanos a un blog ensin actualizar dende fai cuantayá, “Memories d´un ferreteru”. Como´l bon xuiciu nun caduca, la visita vuelve a danos agüelgu pa saltar a “Lux omnia vincit”, o al reguleru para mal de “La hora prestosa”, o al andariegu “Caleyando”, o al bachmannianu “Lletres na papelera”, onde podemos baxar el poemariu de Carlos Suari “El mio cachu tírolu”. Una ruta recomendable en díes grises y crueles como estos, anque nun hai blog que valga contra esti sentir d´ausencia.

Xandru Fernández

Por: eL trAsgU d´aRecEs | Opinión | Comentarios (0) | Referencias (0)