eL trAsgU d´aRecEs

Martes, 04 de julio de 2006

¿QUÉ YE SER ASTURIANU PA LA TPA?

Según cuntaron los periodistes de la TPA tan perpreparaos, puen facer el so trabayu pa la TV, la radio y el periódicu dixital a la vez, ficieron un montón de cursos enantes d´entamar a trabayar y amás saben inglés o francés (anque pue que nengún sepa dicir una fras entera n´asturianu). Tán perpreparaos pa trabayar na TPA o en cualesquiera televisión del mundu, pero non nuna televisión que de verdá fora asturiana, que tuviera como únicu sen tresmitir la realidá d´esti país, non la realidá que la FSA quier pa la so “rexón”.

Somos munchos los asturianistes que llevamos años naguando por ver una televisión dafechu asturiana, pero agora llego y topámonos con coses como esta nel programa “Conexión Asturias”; nuna seición nomada ¿Cuánto cuesta? una reportera dedicase a preguntar a la xente, como diz el nome, si saben cuanto cuesta daqué, güei toca lo que cuesta alimentar una vaca, dempués d´entrugar a delles persones que respuenden en castellán, asturianu y la mayoría n´amestao (la reportera entruga en correutu castellán de Valladolid) apaez la periodista nuna granxa pa qu´un paisanu-y desplique lo que val y lo que comen les vaques, too esto delantre d´una xata nomada Asturiana. La reportera entruga-y al paisanu que dicen que los asturianos comemos muncho si l´Asturiana come de too, hasta mariscu (¿¿¿???), el paisanu pon cara plasmu y respuende. La periodista despide'l reportaxe y avisa a los espectadores que yá saben como alimentar una xata si la quieren tener nel so salón. Conectan colos estudios de la RTPA onde´l presentador amuesa los sos conocimientos sobre la identidá asturiana; “hombre no se yo si una vaca en el salón, que dirían los vecinos, bueno, ahora están de moda los animales exóticos, si ustedes son muy asturianos pues ya saben, pongan una vaca en el salón” (¿¿¿¿¿¿??????).

Nótase que nos esámenes pa entrar na RTPA nun importaba muncho los conocimientos d´Asturies. Yá nin ser más grandón que naide, ni saber escanciar la sidra, nin ponese una montera picona, ¡agora pa ser más asturianu que naide pon una xata nel salón!. Dexa de pateate toles nueches celtes d´Asturies, yá nun fai falta sacar l´asturina a la terraza´l 8 setiembre, dexa de guetar por toles llibreríes del to pueblu esi llibru n´asturianu, nun intentes más sacar un soníu con xeitu de la gaita, dexa de pasate pola Casa Posafuelles cuando vayas de folixa a Uviéu, nin salgas de casa´l día de les lletres. L´asturianía, la nuesa identidá, namás que tien que ver coles xates. Merca una y demientres la cates pon la TPA, pero ten cuidáu nun te vayan detener por radicalismu ya inxuries al rei…

Por: eL trAsgU d´aRecEs | TeleTini | Comentarios (0) | Referencias (0)