eL trAsgU d´aRecEs

Martes, 11 de julio de 2006

BUENOS DÍES, ASTURIES

Dende fai décades los espectadores norteamericanos llevántense cada mañana col magazín informativu de l'ABC “Good Morning, America”, programa que mestura información con entretenimientu. Col mesmu títulu, pero nes sos llingües y col nome de la so comunidá, la mayoría de televisiones autonómiques bauticen a los sos informativos de la hora del almuerzu. Ye de suponer que la TPA fairá lo mesmu dacuando entame la so programación matinal, la pena ye que nel nuesu casu nun va ser como nes demás televisiones de comunidaes con llingua propia y nun van danos los bonos díes nel nuesu idioma. Pero nun hai problema, yá esiste una pequeña emisora de radio en Lluanco que lo fai.

Descubrilo l´otru día cuando llevantéme a eso de les 11 de la mañana y la mio má taba cola radio encesa, xusto escuchando a Luis del Olmo nel 97,5, la frecuencia que llegalmente ye de Radio Sele. Asina que llogre convencela pa que sintonizara otra emisora, entós topamos con Onda Peñes, na qu´escucho cuando pueo los programes quincenales “Asina foi'l Surdimientu” y “A la solombra´l texu”, qu´hasta´l momentu pensé que yeren los únicos programes n´asturianu d´una emisora qué presumía de billingüe y qu´a pesar de ser bonos programes pocu faen (por si solos y ensin más programes n´asturianu que los complementen) pola normalización del idioma al nun representar namás que´l “requexu´l bable” pa garrar sovención del Principáu.

Pero tope col programa “Buenos díes, Asturies”, presentáu por Miguel Fernandi, Burilo pa toos nós. El programa ye amuesa de lo fácil que ye utilizar los medios de comunicación como elementu de normalización llingüística. Ye un programa pa tolos públicos y n´asturianu, onde nun se fala nin de la llingua, nin del asturianismu, anque hai un concursu onde se puen ganar premios si los espectadores aceptan que quier dicir un refrán asturiano o una pallabra na nuesa llingua. Nel magazín fálase de l´actualidá d´Asturies, l´estáu de les playes, información de serviciu públicu, muncha música del país y concursos a traviés de llamaes telefóniques d´espectadores que falen na llingua qu´utilicen davezu, presta enforma sentir a xente que fala dafechu n´asturianu, lo meyor de too´l programa.

Burilo nun tien qu´enguedeyase nin un minutu en contar histories pa rellenar programa porque siempre hai llamaes, dende Cuideiru a Villaviciosa, lo que descubre que´l programa ye siguío por muncha xente que poco o nada tien que ver col asturianismu y cola reivindicación llingüística. La mio má por exemplu esi día nin prendió la tele pa ver a l'Ana Rosa y tovía güei espertéme col cantar “Un pasu p´alantre” que taben pinchando na emisora. Esti programa pue únise a los partíos del Uviéu o la Formula 1 qu´emiten en Radio Sele y a toes eses esperiencies que van más allá del programa n´asturianu pa falar d´esti idioma demientres duren les sovenciones. Programes como estos si normalicen una llingua, porque van dirixios a un públicu mayoritariu y non al micro-mundu asturianista. Tán mui bien los programes que falen de la llingua o del nuesu folclor, pero nun valen pa nada sinón son complementaos con programes “normales” que puean interesar a too´l mundu.

L´asturianu pue echar p´atrás a la xente que nun ta avezáu a él, ye nidiu, pero lo qu´hai que facer ye eso, avezalos. La xente nun va oyer Radio Sele, mercar Les Noticies o metese n´Asturnews si piensen que van oyer falar de les diferencies ente los bables de Campu Casu y el de Riosa o de la independencia d´Asturies, asina que nin tantu nin tan pocu. Ehí ta la RTPA que podría ser el mayor elementu normalizador de la nuesa llingua. Si la xente viera tolos díes daqué n´asturianu (o que nun lu vean, pero que sepan que ta ehí) valdría pa que se dieran cuenta que la llingua ta ehí y ye útil, que val pa más que pa falar de madreñes o qu´hai más xente que fai usu d´ella que los cuatro bablistes/políticos asturianistes de siempre.

Pero Ornia, Areces y Migoya saben qu´a la xente nun-y produz mieu l´asturianu, que namás que fai falta avezalos, por eso tovía nun vimos un programa n´asturianu, y muncho vamos tardar en velo, na TPA. Yo pel momentu tengo “Buenos díes, Asturies”, tolos díes de 11.00 a 15.00 nel 107.7 del dial. Yo tenia mal espertar, pero resulta que namás que teníen que dame los buenos díes na mio llingua.

Por: eL trAsgU d´aRecEs | N´ast | Comentarios (1) | Referencias (0)