eL trAsgU d´aRecEs

Martes, 18 de julio de 2006

TEATRU PA FACER "PAÍS"

Autor; Adolfo Camilo Diaz
Direición; Andrés Presumido
Xéneru; Traxicomedia minera
Actores; Xuan Coll, Cristina Bravo, Carmen Gloria García, Isabel Friera y Aique (Teatro Casona).
Argumentu; Tres muyeres falen nel velatoriu d´un sindicalista-mineru sobre esti y la influencia d´elli nes sos vides. Asina descubrimos a xente qu´engochó una profesión, embargó la Cuenca y vendió Asturies entera, demientres too esto pasaba´l sindicalista tenía otres “preocupaciones”.


L´otru día una collacia mía que trabaya na oficina de turismu d´Avilés cuntóme qu´un paisanu foi quexáse de que´l programa de “Música nel Quioscu” tuviera n´asturianu y que´l yera mui asturianu, de tola vida, pero nun sabía lo que yera xunetu. Si garramos el programa d´esti festival de bandes de música podremos ver que les poques pallabres que nel tán escrites puen entendese dafechamente por una persona que nun domine l´asturianu. Pero hai persones, como esta, qu´enxamás pensaron nos drechos de los demás, que tán percómodos como tán y anque enxamás movilizáronse pa nada, cuando ven que llegamos los del bable y estampamos un xunetu, ¡dios mio un xunetu!, son quien de remover Roma con Santiago pa qu´ellos tengan tolos drechos del mundu y nós, asturfalantes, nin el drechu de nomar a un mes xunetu. Eso si afiten la so asturianidá, de xuru qu´esi yera mui asturianu, que sube tolos años a Cuadonga y ve tolos domingos a Fernando Alonso, vamos lo que ye ser asturianu pa xente asina. Coses como esta m´esmolecen, entamo a camentar que quiciabes el Conceyu Consultivu tenga razón y los asturianos non queramos, nun yá la oficialidá, sinón la nuesa llingua, que tolo que suene asturianu da llerza y suena a un enguedeyu que namás qu´un 5% de la población ye entender. Pero estos camientos murnios tórnanse allegres al ver coses como l´estrenu de la obra de Camilo Díaz “País” nel Palacio Valdés, ver la xente rir por un llibretu xenial que siente cercanu, pola hestoria y pola llingua, un asturianu normativu, anque con dalguna pallabra castellana que se-yos escapó a los actores. L´autor supo llevar a la prautica lo que lleva diciendo dende fai años; qu´hai que crear un teatru modernu n´asturianu sobre les bases del teatru costumbrista. La xente qu´ocupaba´l Palacio Valdés (convertíu yá nel palaciu del teatru n´asturianu) de xuru que pensaba que diba ver una obra de teatru costumbrista como les otres dos que completen les xornaes de teatru n´asturianu, pero tópose con dalgo paecíu pero con unes histories y personaxes actuales, y una llingua usada ensin diglosia, asina que “País” nun defraudo a los espectadores habituales del teatru costumbrista y a munchos asturianistes deseosos de teatru n´asturianu alloñada del costumbrismu. El grupu Teatro Casona supo da-y vida a la hestoria de forma xenial y de xuru que l´autor vería (si nun tuviera nel Hospital Central por un problema llombal) too tal como lu qu´imaxino na so tiesta demientres escribía la obra. Lo peor foron dalgunos fallos nel escenariu móvil de la obra, delles vegaes una de les protagonistes tuvo que disimular los equilibrios que facía al frenar l´escenariu en secu demientres taba actuando. Pero estes coses nun faen de menos la obra, amás d´esto habría que culpar o a Cultura por nun dar una perra o al teatru onde se representó. Pola contra la obra costumbrista que se representa próximu vienres, una obra que nun aportara nada nuevo al teatru asturianu, si tien sovención. Esta que moderniza´l teatru asturianu, conecta col públicu, vieyu y mozu, y tengo nidiu que de ser Asturies un país normal taría representándose demientres años, nun tenía nin una perra del Principáu. Pero a pesar d´ello´l grupu Teatro Casona celebro a lo grande los sos 20 años, si tenéis oportunidá nun perdáis “País”, lo del vienres foi l´estrenu, agora queda la representación per Asturies, esperemos que-y dexen llegar a toos llugares, dende Llanes a Castropol, pasando per Uviéu, asina quiciabes tola xente diría velu y entamarien a deprender que mes ye xunetu, xineru, payares, avientu...

Por: eL trAsgU d´aRecEs | N´ast | Comentarios (0) | Referencias (0)