eL trAsgU d´aRecEs

Jueves, 20 de julio de 2006

EL LLIBRU N´ASTURIANU QUE MÁS VOS PRESTA

Imaxe del Conceyu Soberanu d´Asturies y Llión, cabera vegada que los dos países foron un estáu dixebráu y tuvieron xuntos

Güei atravesaré la llenda ente dos países qu'hebo un tiempu que foron ún solu y qu´esperemos que tean uníos demientres munchos sieglos por una mesma llingua qu'hasta entamos del sieglu pasáu foi la llingua mayoritaria a dambos llaos del Cordal. Esti fin de selmana toca dir colos collacios de vacaciones y garrar l´Alsa, atravesar el Negrón y baxar hasta Coyanza (Valencia de don Juan en castellán), entós un garapiellu d´ástures transmontanos mesturarémonos colos ástures cismontanos y quiciabes nuna nueche folixera de lluna enllena y dempués de dalgún vasu más enlleno d´alcohol que d´otra cosa decidamos lluchar escontra Castiella y lliberar la tierra de los ástures del sur de la so ocupación (los ástures del norte pamidea que tovía tenemos que lluchar muncho escontra la tribu de la efesea). Quiciabes tamién pue que dalgún día subamos a Llión y la folixa llévenos hasta la cabera capital del que foi l´estáu dixebráu de nueso.

Tenía abondes ganes de visitar el país hermanu pa pegar la oreya y sentir el so xeitu de falar, pue que seya una llaceria yá que la situación ye milenta vegaes peor qu´equí, anque la verdá cuntáronme que Coyanza ta enlleno d´asturianos nel branu y hai más sidreries qu´en Piedras Blancas. Asina qu'hasta´l llunes les trasgaes voi faceles per Llión y non nesta páxina, pa que nun vos aburráis muncho mándovos deberes; ¿por qué nun escribís equí un comentariu col meyor llibru de narrativa n´asturianu que lleístis?. Asina entre toos a ver si damos cola meyor novela o llibru de cuentos de les nueses lletres, amás tamos en branu con muncho tiempu llibre y asina de xuru que daisme a min y a tolos que pasen pequí dalguna bona suxerencia pa llenar el branu con hestories n´asturianu. Yo voi llevar na mio maleta “Potestas” de Xulio Arbesú que ye un llibru entreteníu, pero entrúgome si dalgún día finará (cuasi 450 páxines con lletra pequeña), asina imaxinaréme ser Gonzalo Pelaez caleyando peles tierres del Reinu de Llión nel sieglu XXII. Polo menos si queda tiempu ente folixa y folixa quiciabes m´avere a dalguna llibrería a ver si topo “Cuentos del Sil” y garrar el primer llibru asoleyáu na nuesa llingua nel País Llionés dende fai 10 años, ye hestóricu. Hai munchos llibros hestóricos en 30 años de Surdimientu (y 5 sieglos de lliteratura escrita), ¿cuál ye´l tuyo?.

Por: eL trAsgU d´aRecEs | Lliteratura | Comentarios (0) | Referencias (0)