eL trAsgU d´aRecEs

Jueves, 03 de agosto de 2006

3 MOTIVOS QUE XUSTIFIQUEN UNA TELEVISIÓN PÚBLICA

•Normalizar la llingua propia y dar a conocer la cultura del país, sobremanera sofitando toles manifestaciones espresaes nesa llingua minoritaria.

•Crear industria audiovisual a traviés de la realización de programes en collaboración coles productores autóctones, asina dir fortaleciendo esti sector y trabayar nun futuru en comuña na realización de series y películes, asina como favorecer la difusión de tolos productos audiovisuales independientes fechos nel país como curtiumetraxes, videoclips...

•Cohesionar el país ufiertando una imaxe real y actual d´esi país, con una visión moderna y tamién respetando toles tradiciones, al mesmu tiempu que tien qu´arriesgase a modernizar lo más vieyu de la tradición del so pueblu.



3 MOTIVOS POLOS QUE LA TPA NUN VAL PA NADA

•TeleTini nun tien nengún programa n´asturianu, nin siquiera una mini-seición como hai en dalgunes televisiones llocales pa deprender asturianu (dalgunes voces averaes a l´asturiana falen de que lo máximu que va haber cuando yá tengan tola parrilla completa ye seiciones en dalgún programa onde s´entrugue a la xente na cai´l significáu de dalguna pallabra o fras, amás de presentar nel magazín “Transeúntes” tolos llibros n´asturianu que vayan asoleyándose). Quexábamos de los “requexos del bable” que teníen los medios de comunicación del país pa xustificar la sovención del Principáu pero en TeleTini nin requexu del bable, pagámosla toos y en tola llexislación asturiana, dende´l propiu estatutu hasta la llei de creación de la RTPA, falase d´utilizar los medios de comunicación públicos pa normalizar la llingua del país, pero nin los peores presaxos pensaben que la cosa diba ser asina; nengún programa n´asturianu. Y mira qu´hai programes que, polo menos pa min, nun tienen sentíu en castellán; un trasgu y un cuélebre cuntando histories en castellán (¿¿??) y llamando prestosos a los guah.es (¡que peligru!), que ye pa qu´a los neños de-yos llerza esa pallabra al asociala cola pederastia, o les emisiones de deporte tradicional asturianu, un 10 pa l´autonómica si les retresmisiones foren na nuesa llingua, pero queden nun aprobáu al facelu en castellán normativu. Ayeri mesmu ví un reportaxe nel “TPA Noticias” sobre los cursos de l´ALLA n´Ibias, en “Panorama Regional” tamién faen un reportaxe tolos años sobre estos cursos y ye una de les como muncho cinco noticies que se dan n´asturianu en TVE añalmente, en TeleTini yera en castellán. Quien tenga enfotu tovía que s´acostume, la TPA nun va usar la nuesa llingua nin simbolicamente. Pel momentu lo únicu que se pudo ver en TeleTini n´asturianu ye dalgún capítulu de la serie “Cinco Poemes” ensin anunciala previamente pa rellenar publicidá, yá que nun puen llenar un bloque publicitariu ente programa y programa col anuncio de la Central Lechera y el de los cuatro programes que tienen. De la toponimia meyor nun falar.Ye nidiu, TeleTini nun va normalizar l´asturianu.

• TeleTini nun va fomentar la industria audiovisual asturiana, pa ello tendría que cuntar coles productores asturianes pa que medraran y nun futuru poder realizar series, tv-movies, películes... pero lo de l´asturiana ye únicu en toles televisiones autonómiques del Estáu. Nelles convocase un concursu públicu de conteníos pal mediu y el meyor proyeutu ye l´escoyíu. En TeleTini non, inventóse una productora fantasma, Zebrastur.com, que namás que ye una sucursal n´Asturies de la empresa foriata Zebra, polo tantu los beneficios dirán pa Madrid, amás esta productora ye la encargada de producir tolos programes. Per otru llau la mayoría de noticies daes nos informativos son compraes a les televisiones llocales, que son empreses privaes que suministren información pa la principal seña d´identidá d´una televisión como son los sos informativos, sobre too una televisión pública. El restu de programes son producíos por productores montaes polos periódicos asturianos (toos integraos en cadenes estatales) o tovía peor a medies con productores foriates (el casu de “la nueva engaña” colos deportes). Tamién había un importante contratu con “El Comercio” p´abrir sucursales de TeleTini en toles villes del país (menos Uviéu que ye pa Telefónica), pero nun sabemos por qué motivu nun llegó a bon puertu. Con toes estes midíes aseguráronse de que tolos periódicos falen maraviyes de la TPA, menos “El Comercio” que simplemente nun diz nada. Polo tanto TeleTini nun creara una industria audiovisual asturiana.

• Y que falar de la imaxe del país, si ye que les emisiones de TeleTini llegan a tol país, polo menos na mio casa vese fatal y en B/N. La imaxe d´Asturies ye una imaxe onde nun hai una cultura propia diferenciada, lo que diferencia a los asturianos ye beber sidra, adorar a la santina y qu'hai munches fiestes pol branu, pa comprobalo ver un día “Conexión Asturias”. Había xente que dicía que lo únicu que diba haber de música asturiana yera imáxenes bucóliques d´Asturies con música de gaita, pues non, o l´”Asturias” de Melendi o musiquina n´inglés de fondo sobre les imáxenes de l´Asturies rural. TeleTini nun cohesionará esti país dividíu polos llocalismos.

Comprobáu, la TPA solo tien un motivu; mantener a Tini Areces y a la FSA nel gobiernu d´esti país. Esti país que ye cada día más “región”, polo menos pa los que nos gobiernen, y pa la TPA, ye nidiu.

Por: eL trAsgU d´aRecEs | TeleTini | Comentarios (1) | Referencias (0)