eL trAsgU d´aRecEs

Jueves, 03 de agosto de 2006

PRIMER ESPULSIÓN NA GRAN CASONA

Ramón d´Andrés, l´espulsáu de la selmana, llamando a Valledor

Primer selmana na gran casona y primer espulsión. Güei l´espulsáu con un 42,8 % de los votos ye Ramón d´Andrés, dexando a Xuan Bello como´l únicu representante de los posibilistes. Namás saber qu´él yera l´espulsáu d´Andrés llamó pol teléfonu a Valledor pa que lu fora buscar en coche y llevalu a la Conseyería de Cultura pa facer llimpieza, yá que según dixo tien un montón de papelones na so oficina colos nomes d´un garapiellu de pueblos del país que yá nun valen pa nada y tienlos qu´echar a reciclar. Los caberos momentos del direutor de la oficina de política llingüística na casona acabaron con una gran discusión ente él y Ana Cano, ya qu´esta última glayó al altu la lleva al saber que Ramón salía “H.e, h.e, asina acaben los posibilistes, yá namás que queda ún, igual gana y too, h.a, h.a” y entamando una gran engarradiella a la qu´acabaron sumándose García Arias y Xuan Bello, Pablo Manzano demientres taba na cocina pelando patates y cantando “Soi de Verdiciu, ñací a la vera del Cabu Peñes, xunto a la mar…”, polo que nun s´entero de nada.

Y ye qu´últimamente Ana Cano ta siempre metida en toles griesques que pasen nel concursu. Ayeri demientres Xuan Bello interpretaba un monólogu pa entretener a los madrilanos nes cenes, una muyer entrugo-y a Ana Cano, que como sabéis ye la camarera, que si “lo que habla que es gallego, suena tan rústico”. Ana Cano tiro-y el pote de berces que taba sirviendo por riba la cabeza, menos mal que García Arias taba cerca que sinón la cosa llega a les manes. Otros que tampoco lu llevaben nada bien yeren Arias y d´Andrés, yá que caún tentaba quedar por riba l´otru dacuando interpretaben los cantares de gaita y tambor y siempre acababen faciendo unos ruíos insoportables colo cual los madrilanos marchaben corriendo y ensin pagar les consumiciones. Esto paez que nun volverá pasar pola salida de Ramón d´Andrés. Lo que nun dexen de facer los madrilanos ye felicitar a Manzano polos sos menús típicos asturianos, anque yá llevanto la envidia de Xuan Bello, yá que siempre sal nos cafés a cuntar unos chistes y los madrilanos siempre rin más colos chistes de Manzano que colos monólogos de Bello y el gran poeta asturianu nun pue soportar que daquién tenga más valir lliterariu qu´él.



Manzano ganóse´l ciñu del públicu colos sos chistes

Esta selmana ye la cabera votación pa escoyer un espulsáu, la selmana que vien quedaran tres concursantes y habrá qu´escoyer un ganador que tendrá tol poder sobre la llingua d´esti pequeñu país nomáu Asturies. Namás que queden dos programes, nun pues perdelos.

Por: eL trAsgU d´aRecEs | La Casona de los Bablistes | Comentarios (0) | Referencias (0)