eL trAsgU d´aRecEs

Martes, 08 de agosto de 2006

Educación quier inxertar conteníos de llingua y cultura asturianes na estaya d’infantil

LA MIDIDA TA EN PROYECTU DIENTRO DE L’ADAPTACIÓN DE LA LLEI D’ENSEÑANZA A ASTURIES

La Conseyería d'Educación tien en proyectu l'inxerimientu de conteníos de llingua y cultura asturianes dientro de les estayes curriculares de la educación infantil. El departamentu que dirixe José Luis Iglesias Riopedre quier llevar alantre esta midida aprovechando la obligatoria adaptación que tien de facese al sistema educativu asturianu de la Llei Orgánica d'Enseñanza. El Conseyeru d'Educación adelantó esti proyectu, que supondría'l primer pasu pa la entrada de materies de llingua asturiana como enseñanza universal pa tolos escolinos, y non como materia optativa, dientro de los Cursos de Branu de l'Academia de la Llingua, que se desaerrollen dende la selmana pasada n'Ibias, anque'l responsable de temes de llingua asturiana dientro de la Conseyería d'Educación, Fernando Padilla, comentó a Asturies.com que l'anuncia que fexo Riopedre ye entovía una "idea por desarrollar". Padilla esplicó a esti mediu que l'oxetivu col que se trabaya ye'l d'inxertar nel curriculum d'enseñanza infantil una serie de conteníos básicos de llingua y cultura asturianes qu'entraríen de manera tresversal nes estremaes árees curriculares qu'igüen esta estaya básica d'enseñanza que s'imparte ente los 3 y 6 años.

Otramanera, dende la Conseyería d'Educación adelantóse que, en cumplimientu del Plan de Normalización, encargóse-y al xurista Leopoldo Tolivar Alas un nuevu estudiu que tien de determinar, a la lluz del marcu llegal actual, les posibilidaes de creación de la especialidá del profesoráu de llingua asturiana y gallego-asturianu na enseñanza non universitaria. De crease la especialidá, una reivindicación bien de vieyo de los sindicatos d'enseñanza y de l'Academia de la Llingua, afitaríase la posibilidá de que los profesores de Llingua Asturiana pudieren participar, n'igualdá de condiciones col restu d'especialidaes, nos concursos de tresllaos y d'oposiciones.

Otru de los proyectos colos que trabaya la Conseyería d'Educación céntrase na Educación d'Adultos. Fernando Padilla esplicó a Asturies.com que se trabaya nún Plan d'Educación d'Adultos que quier facer llegar a tolos centros d'educación d'adultos la posibilidá de facer estudios d'asturianu.

ASTURIES.COM (8/8/06)

Por: eL trAsgU d´aRecEs | LLINGUA | Comentarios (0) | Referencias (0)