Acerca de
Búsqueda
Categorías
Archivos
Sindicación
Créditos
Diseñado por Studio.st
Online gracias a Bitacoras.com
Miércoles, 23 de agosto de 2006
LA COMUNIDÁ D´ASTURBLOGS VA MEDRANDO
El mundu de los asturblogs sigui medrando. Agora yá podemos topar con un blog n´asturianu occidental. El nome ye MunduXaime y podéis entrar nelli pinchando equí, va prestavos, nun vais parar de rir. Yo pel momentu paso´l día na biblioteca d´Avilés estudiando les tres asignatures que me quedaron pa setiembre (amás tamos en Sanagustín, fiestes patronales d´esta villa del adelantáu na que vivo y hai que folixar un poquitín), asina que nun tengo tiempu pa escribir daqué, polo menos hasta mediaos de setiembre. Los dos últimos programes de “La Casona de los Bablistes” van tener qu´esperar al entamu de la próxima temporada, lo que si podéis facer ye siguir votando, anque paezme que yá nun hai nada que llibre a Xuan Bello de salir espulsáu. Lo que poco que puea meter nesti blog van ser noticies d´otros medios que camiente que puen ser d´interés. Agora déxovos con un de los meyores poemes de la lliteratura asturiana, vémonos dempués de los esámenes y deseáime suerte (faime falta, muncha falta!!!);
Llevantar una casa que seya como un árbol,
como Dafne crecer peles sos rames,
sentir les estaciones,
la fueya nuevu depués de la ivernera,
les frutes primeres del veranu.
Una casa que seya como un árbol
qu´aguante los rellampos,
qu´escample la pedrisca,
qu´espante lloñe la ventolera xélido del tiempu.
Llevantar una casa que seya como un ríu,
navegable y llixera , mudable, pasaxera,
beber de les sos fontes,
parame peles poces, correr pelos regatos .
Una casa que seya como un ríu,
qu´arrastre la derrota,
qu´arranque'l dolor de les sequeres
y lu lleve pel rabión, agües abaxo.
Llevantar una casa que seya como un mundu,
andar les xeografíes de pasiellos,
cordales d´escaleres, les ventanes abiertes,
les pontes, los caminos.
Sentame na antoxana a ver andar la vida,
una amiga, un país, una llingua,
saludar un instante cuando pasen.
LLevantar una casa que ponga l´nuestru nome,
les señes que´un día enquivocamos,
una palabra, un rostru, la memoria d´aquello que quiximos,
y asina llevantar una casa namás que por si vuelves.ç
Berta Piñán
Por: eL trAsgU d´aRecEs | Caxigalines | Comentarios (4) | Referencias (0)
Comentarios
¡Coime, Fernandoalonso d'Ibias! ¡Asina que yes tu (acabo descubrilo nel blog de Xaime)! Yo soi Laura, de Mieres (la moza de Vitor l'ayerán).
Norabona pol to blog, presta atopar unu tan constante y reivindicativu. Si vas pal día d'Asturies a Nava, verémonos, qu'esperamos axuntanos ehí unos cuantos "ibicencos".
Por cierto, tengo yo tamién un blog n'asturianu a estrenar, ya lleva dellos meses paráu, en breve quiero ponelu en marcha: www.pallabres.bitacoras.com
Un abrazu
L.leura | 24-08-2006 11:13:11
Bua, cumo me prestóu qu'entrarás!!! Los tous comentarios faza'l mieu blog nun son fundaos, que conste. ía una mierda, una pérdida de tiempu lleelu.
Non, agora en seriu, ía un honor lleer eiquí un comentariu tan bono cumo'l tuyu (de xuru que nun ía honestu, h.a h.a).
Cuando acabe los esames tamién lu actualizaréi, ya añedirei unas nuevas entradas que teo prometidas. Espero que volvais a entrare.
Ta llou amigos
Xaimine | 25-08-2006 12:21:43
xaimine outra vegada | 25-08-2006 12:29:48
Yo perafítome na honestidá, h.e, h.e.
Paez que tamos toos igual, hasta setiembre nun podemos atender muncho pa los blogs polos esámenes. El tuyu ta perbien Xaime y yá tengo ganas de ver el de Laura. A lo del día d´Asturies nun voi poder porque cuadrame en mediu dos esámenes, como muncho diré de mani. Pero bono el 17 de Payares paez qu'hai que tornar a salir a la cai a pidir los drechos llingüísticos del pueblu asturianu (3ª vegada nel añu y ensin contar concentraciones escontra la represión llingüística!!!), y elli nun pue faltar tola tropa “ibizenca”.
A min tamién prestáronme muncho los vuesos mensaxes, hai que da-y vida a los asturblogs. Venga collacios, salú y munchos besos.
el trasgu d´Areces | 25-08-2006 16:13:24
Comentar
