eL trAsgU d´aRecEs

Jueves, 31 de agosto de 2006

"NUN QUEDAREMOS EN SILENCIU"

Un ciudadanu norteamericanu d´orixe árabe, Raed Jarrar, nun pudo garrar un avión en Nueva York haza la costa oeste porque llevaba una camiseta con un mensax pacifista en llingua árabe ya inglesa. Jarrar tornaba de visitar los campos de refuxaos libaneses en Siria y la seguridá del aeropuertu Kennedy considero ofensiva la fras “nun quedaremos en silenciu” nes dos llingües citaes. Cada vez tamos peor por esti mundu occidental, tan civilizáu a la par que capitalista. Un drechu fundamental que nun pue faltar en cualesquier constitución democrática como ye la llibertá d´espresión ye elimináu ensin mayores consecuencies, mientres, los medios de comunicación callen. N´Asturies, por exemplu, mándante a xuiciu por glayar oficialidá delantre del Caudiellum Areces, o por facer una pintada pola oficialidá en Llangréu, naide diz nada y los medios de comunicación menos, o si lo dicen enllordien, como por exemplu la Cadena Ser, tan imparcial ella, dixo que les 6 persones de la Xunta taben llamaes a xuiciu por agredir a Areces, los de la SER tienen un nome; mentirosos y llambeculos del PSOE. De dalguna manera tien que pagar el grupu Prisa que-y concedieran una de les dos llicencies de televisión estatal n´abiertu. Y que pasa si los medios llevantan la voz y muéstrense críticos col gobiernu de turnu, como pasa actualmente en “La nueva España” col estrañu llibru anónimu que recuerda lo bien y chachiguay que va Asturies, pues nada, diz el Principáu “vamos dar nuncia de que yá ta abiertu´l concursu pal canal priváu autonómicu de TDT que debemos ser la única comunidá que tovía nun lo fizo y ya verás como tolos periódicos callen”. Pel momentu nengún mediu gorgutio pallabra sobre que namás se conceda un canal pa la explotación privada de los cuatro colos que cuenta Asturies y que´l Principáu quede coles otres tres. Nun vaya ser que critiquen al gobiernu y al final el canal vaya pa “El Comecio” o “La Voz de Asturias”. Ye la prensa d´anguaño, siempre en busca de la verdá y al serviciu del ciudadanu .

Podéis lleer más de la hestoria de Raed Jarrar nel so blog.

Por: eL trAsgU d´aRecEs | Opinión | Comentarios (0) | Referencias (0)