eL trAsgU d´aRecEs

Jueves, 07 de septiembre de 2006

ASTURIES XIXILADA POL “GRAN HERMANU”

Bienvenidos a Gran Hermano… Bienvenidos, como les decía, a la vida en directo… Son, en este momento, las nueve y media pasadas del día 23 de abril, el día de San Jordi. Una fecha que hay gente que piensa que va a marcar un antes y un después de la historia de la televisión en España. Si así fuera, francamente les confieso que estoy muy orgullosa de estar esta noche aquí y empezar este trabajo en esta cadena. (Mercedes Milá na primer edición del programa)

El llibru de George Orwell “1984” ye un llibru que m´asombró na primer llectura, amás de convertise nuna de les mios noveles favoritos. Esti clásicu de la lliteratura universal, que tendría que ser de llectura obligada nos institutos, narra la historia d´un home, Winston que se revela contra un mundu onde´l “Gran Hermanu” remana´l presente y el pasáu controlando tolos requexos de la sociedá, un mundu onde los sentimientos y les emociones son una cosa del pasáu y l'únicu sentimientu permitíu ye l´adoración del “Gran Hermanu”. Anguaño gracies a la televisión que más beneficios tien del mundu´l “Gran Hermanu” ye un programa de televisión que representa´l “pan y circu” romanu d´una sociedá que s´idiotiza xunto´l televisor viendo “la vida en directo” (o los problemes de 12 analfabetos que tienen tan pocu apreciu por ellos mesmos que venden la so propia esistencia pa vivir ensin trabayar) y non una metáfora del totalitarismu y un glayíu escontra la uniformidá de pensamientu como escribiera George Orwell. Si esti llevantara la cabeza y viera esto de xuru que pensaría que la so ficción ta mui ceo de facese realidá.



Esti mundu orwellianu, polo menos pa min, nun me paez tan llonxanu. Les táutiques usaes pol estáu totalitariu de “1984” son exaxerariones de les usaes por munchos mandatarios actuales del mundu, dalgunos tóquennos mui de cerca. Nel mundu futuru que l´escritor imaxinó en 1949 fálase la neollingua, una llingua curtia en lléxicu cola fin de reducir al máximu la espresión humana. Les persones de “1984” son persones ensin sentimientos yá que nun tienen pallabres pa espresar aquello que sienten, nun tien nome, polo tantu nun esiste. Esta prautica tien un nidiu sentíu; cuando menos llingües y menos vocabulariu menos maneres distintes d´espresar les coses, menos diversidá, menos opinión, más uniformidá. Na sociedá na que se desendolca la novela´l “Gran Hermanu” ye´l gran líder del Partíu, la organización política líder n´Oceanía, una de les tres superpotencies en que ta dixebráu´l mundu y onde Orwell asitia la historia. El “GH” ye únicu y omnipresente y xixila tola sociedá, ye´l guarda y el xuez. El “GH” ye como un Dios, naide lo vio realmente y nun sabemos si esiste de verdá, pue qu´en realidá namás seya un iconu creáu p´adoración de les mases. El Partíu ríxese pol “ingsoc” (socialismu inglés en neollingua) y tol mundu ta obligáu a pertenecer a él. La principal función del Partíu ye mantenese nel poder camudando o borrando´l pasáu al so antoxu y acabar con toa realidá estremada del “ingsoc” eliminando toa amuesa de rebeldía colos castigos na Sala 101 (una sala de tortura onde los castigos tán basaos nos peores suaños del rebelde), asina nun habrá más verdá que la de so y tarán eternamente nel poder, lo únicu que-yos importa. El Partíu mantien a la sociedá sodesarrollada, baxo mímimos, pero fai ver a los ciudadanos qu´enxamás tuvieron tan bien pa que nun intenten meyorar. Les ires del pueblu son dirixíes dende´l poder escontra l´enemigu; una de les otres dos superpotencies del mundu tando nuna guerra permanente con una demientres ta aliáu cola otra. Nun importa si ye Eurasia o Asia Oriental, el Partíu yá s´encarga de camudar la historia pa que l´enemigu pase a ser aliáu y viceversa, ye perimportante que siempre haya un enemigu. Tamién hai pantalles de televisión en toes partes qu´engañen continuamente al pueblu coles noticies que quier dar a conocer el “Gran Hermanu” y onde s´emiten cursinos de neollingua. Los únicos que se llibren del control son los “proles”, pero ellos son consideraos como animales y nun tienen drechos.



A vegaes camiento qu´Asturies ye una gran representación teatral continua de l´argumentu de “1984”, quiciabes Areces lleó´l llibru y prestó-y muncho lo de poder ser el “Gran Hermanu” y decidió convertir too esto nuna gran mentira con unos escuros intereses. Nesa gran mentira'l nuesu país sería Oceanía. El Partíu sería la FSA y la so ideoloxía el “espsoc” (socialismu español del más ranciu en neollingua). La FSA quier tar eternamente nel poder y nun-yos importa´l so pueblu, namás tar na poltrona eleición tres elección. Asturies cada día ta peor, nun hai trabayu y tamos condenaos a vivir del turismu, pero ellos dicen que nunca tuvimos tan bien, que superamos la crisis y que tenemos que tar arguyosos, ye la so verdá. La neollingua ye´l castellán, si l´asturianu vive significa identidá, diversidá, diferencia, una cultura dixebrada de la española, entós namás que se pue falar n´español porque somos españoles y puntu, tienen que dexar morrer l´asturianu o sinón pue espoxigar el nacionalismu. Dende la FSA tienen que condergar a too aquel qu´en públicu pida la oficialidá, llevalo a xuiciu si ye necesariu (el castigu na Sala 101), ye la realidá estremada del “espsoc” qu´hai qu´eliminar. Tamién quiérennos facer ver qu´ellos son los que más faen pol asturianu pa que nun queramos meyorar. La FSA nun tien que cambiar la historia, namás tien que facer que nun se sepa muncho d´ella, edúcante na escuela non como asturianu, sinón como español, enseñante qu´en Cuadonga nun ñació Asturies, ellí nació España, la to llingua ye marxinada o nun hai tal llingua, ye un dialeutu que nun merez la pena deprender. La cultura asturiana nun esiste como tal, namás qu´hai museos onde s´amuesen les tradiciones de la “región” o la so gastronomía. Les principales señes d´Asturies son Fernando Alonso, Víctor Manuel, Leticia con z y Melendi y como asturianu taras obligáu a adoralos. Tamién tenemos una televisión qu´emite la única verdá, lo que quier el “Gran Hermanu”, y llámase TPA, amás ta intentando acabar coles televisiones llocales pa ser la única y verdadera, la voz de l´Asturies del “espsoc”. Tamién quier facer desaparecer la diversidá llingüística emitiendo nuna sola llingua, pel momentu nun ficieron cursinos de castellán na TPA, pero podemos esperar cualesquier cosa. Llueu taríamos los asturianistes, nós seríamos la “prole”, ensin nengún drechu y ensin importái a naide lo que pensemos, viviendo nun guetu. Y finalmente'l gran líder, el “Gran Hermanu”, ye nidiu, sería Areces, ye´l líder del “espsoc”, pero namás que ye un iconu, nun esiste, nun tien nenguna función como tal, en realidá los grandes líderes del Partíu remanen nesti país dende Madrid, ellos son el “Gran Hermanu” real. Pero a Areces tenemos qu´adoralu y tenéi respetu, porque sinón seremos castigaos. Demientres el pueblu asturianu sigui votando al Partíu, apigazaos, silenciosos, ensin dase cunta que cada día van perdiendo la so esistencia, el so sentir, porque´l so país muerre y nun son a velu.

*Hai una versión n´asturianu d´un llibru de George Orwell, “Animal Farm”, col títulu de “Cá los animales” (ALLA, 1995. Torna d´Octavio Trapiella).

Por: eL trAsgU d´aRecEs | Opinión | Comentarios (1) | Referencias (0)