eL trAsgU d´aRecEs

Sábado, 09 de septiembre de 2006

LA PITA Y LA REIVINDICACIÓN LLINGÜÍSTICA DAN EL SALTU A LA TV

Ayeri la RTPA medró un poquitín más. Tele Tini aprovecho´l día de la nación pa inaugurar la so programación mañanera, facer la so primer gran retresmisión importante (la misa de Cuadonga, -puxa l´estáu llaicu-) y fizo una especie de presentación oficial del canal entrevistando en tolos programes a los presentadores del mediu y emitiendo reportaxes ente los programes entrugando a personalidaes de la política y la sociedá asturiana que pensaba de qu´Asturies tuviera una televisión pública. Tamién entamo a emitir (y a silenciar a Radio Sele) en prebes la RPA a les 8 de la mañana con un cantar de Felpeyu, n´homenax al grupu . Tuvi poniendo la radio en dellos momentos del día y si la cosa sigui asina, veremos, va haber una presencia curiosa de la música fecha nel país (hasta la canción “Dime como ye” de Dixebra, pensé que diben que tener que pasar munchos años enantes de sentir a esti grupu na RTPA). Pero ún de los díes más importantes de RTPA la Pita y los pitinos nun diben quedar en casa; toles conexones dende Nava cuntaron cola reivindicación llingüística y los intentos de censura por parte del equipu de Tele Tini. Nel “Conexión Asturias” demientres entrevistaben a Elias de Llan de Cubel llegó la Pita y pitinos col cartel de “TV asturiana n´asturianu” y el cámara enfocó al suelu hasta consiguir xirar la imaxe y filmar a un grupu de baille que taba´l llau. Elias nun se vio en tola entrevista. Dempués tornaron cuando taben amosando una preba de deporte tradicional, entós cortaron direutamente pero viose como emburriaben a la Pita, nel programa nun conectaron más con Nava. Bueno dicir que yo nun vi´l programa y toa esta información ta sacada de los foros d´Asturies.com. Lo que si vi foi´l TPA Noticias y pudi ver les conexones dende Nava y casi muerro cola risa, el cámara intentando que nun vieran los carteles y nun consiguiéndolo porque nun sabia que facer y tanto quería cerrar el planu que nun sabía si tirar pa la esquierda o pa la drecha y acabábanse viendo tolos cartelos, la periodista falando a toa priesa p´acabar y con una sonrisa falsa d´oreya a oreya. El planu que-y fizo´l cámara pa que nun se viera lo que reivindicaben detrás dexaba ver los pensamientos de la reportera; ¡Ay, a mi esto no me lo han enseñado en los cursos, que se acabe la conexión ya que no tengo ni idea de que hacer, que mal lo estoy pasando!. Yo creo que d´esta nun vuelven facer una conexón en direutu na vida. Pero amás de too esto, en Tele Asturias, demientres entrevistaben a Areces na terraza de la casa´l conceyu s´oyíen continuamente glayíos d´oficialidá, el reporteru entrugó-y ante lo que taba pasando pola situación de la llingua y él, como non, dixo que yeren reivindicaciones minoritaries. Vamos que güei los nuesos drechos saltaron al terrenu mediáticu, mañana igual salimos nel Tomate y too.



La verdá que pase tol día prendiendo ca poco la tele pa ver Tele Tini nel día de so puesta de llargu (y xusto me perdí lo meyor). Sorprendióme un reportax qu´emitieron nel especial dende Cuadonga´l pocu d´entamar la programación, falaben del significáu de Cuadonga pa la hestoria d´Asturies y tábame esperando oyer lo de trubiecu d´España, pero non, la voz en off dixo más o menos que Cuadonga foi un fechu nacionalista porque los ástures llevantáronse escontra l´invasor pola so independencia fundando lo que güei conocemos como Asturies, abluque, pensé que nun me ficiera efeutu´l café y taba suañando. Tele Tini tamién aprovecho´l día p'anunciar los nueves programes de la nueva temporada qu´entama´l llunes. A lo llargu del día les novedaes foron los anuncios de dos series coproducies ente varies autonómiques, ello ye que Tele Tini namás que punxo perres y eses series nun van reflexar nada d´Asturies y nun dieron un res de trabayu a nengún asturianu, vamos que podía haber aforráu pa facer una serie baratina de temática asturiana que diera trabayu a los actores y los técnicos d´equí. Amás na serie oyi comentarios un poquitín homófobos, nel anunció d´una un personax dicía “mariconadas las justas” y nel de la otra un vieyu dicía “¿llevas esa bolsa azul al trabajo?, ¿no te toman como un gay de esos?” a lo qu´otru retrucaba “trabaja en un programa de corazón, es mejor que le tomen por un gay de esos”. Quiciabes ye esaxeración mía al escuchalo sacáu de contesto pero nuna televisión pública que tien qu´educar a la población (educar non manipular) debíen curiase de comentarios asina, que tamos nel sieglu XXI por dios, claro que les series son rodaes en Madrid y polo tanto por TeleMadrid (Telesperanzaguirre). Pero ensin dulda lo que más me fadio de tol día foi´l programa esti de “Mañana usted Madruga”, tres decidir aguantar por un día los sos penosos chistes y les sos rises enllataes por más de 5 minutos. El presentador madrilanu del programa entamo faciendo un penosu monólogu de la situación d´Asturies, riéndose de les nueses mayores traxedies. 3 exemplos; “Asturias es la tercera comunidad donde más tarde se van los hijos de casa por la falta de trabajo y la falta de una vivienda digna, ¡¡¡jolín que los perros dejan a los padres al año!!! (rises enllataes)”. Como pue facer daquién risión d´un tema asina, ¿por qué enxamás fai un chiste del gobiernu culpable de la situación?. Más coses; “Asturias es la comunidad donde hay más pueblos abandonados. Claro, se quedan vacios después de las vacaciones, recordar, no abandonéis los pueblos en verano, el nunca lo haría (rises enllataes)”. Que guapu facer humor del desaniciu del campu asturianu. Otra más; “Asturias es la comunidad con mayores ingresos en los hospitales por consumo de drogas, claro, ven a las ambulancias y van detrás de las luces”. Entrugo otra vegada; ¿Cómo pue facer risión d´un tema asina?, nun ye mui triste qu´haya mozos que nun vean meyor salida que drogase pa polo menos el fin de selmana escaecese de los problemes, de la falta de trabayu, de ser una lleenda urbana en potencia. Xusto rise de les consecuencies de les polítiques aplicaes polos partíos españoles n´Asturies. Espero qu´esti seya´l primer programa que caiga de la parrilla de la TPA. Dempués emitieron un debate sobre los 30 años de ¿democracia n´Asturies? colos presentadores de los informativos de la TPA (esto ye pluralismu). Enumero los temes que se trataron; Infraestructures (tamos percomunicaos), Premios Príncipe (lo meyor de lo meyor), la sidra y la gastronomía (como-y presten a los de fuera), Borbones (que guapu´l principín y la Leti periodista préstanos mogollón) y Fernando Alonso (el futuru d´Asturies). Nun toi faciendo una parodia, faláronse estos temes… Menos mal que la Pita fizo güei la so presencia entre tanta basoria. Bono, yo vi dir pa la cama que güei vi muncho la TPA y me han entrado unas ganitas tremendas de dormir.

ACTUALIZACIÓN;
Y los medios de comunicación ¿asturianos? insulten, manipulen y desinformen;

"los trabajadores de la Televisión del Principado de Asturias (TPA) que se encontraron con los cables de las cámaras fijas cortadas, así como sus conexiones con la unidad móvil. Lo habían dejado todo listo la noche anterior para transmitir la ceremonia por primera vez íntegra y en directo y se encontraron con un sabotaje en toda regla. Algunos atribuyeron la fechoría a grupúsculos asturianistas independentistas que celebraron el Día de Asturias a su manera" (LVA)

"Por la tarde, en Nava, la pita de Andecha intentó dificultar la emisión acompañada de varias pancartas" (LNE).

Por: eL trAsgU d´aRecEs | TeleTini | Comentarios (2) | Referencias (0)