eL trAsgU d´aRecEs

Martes, 19 de septiembre de 2006

CÁ LOS ANIMALES

"Ca los animales" (Animal Farm). George Orwell (Torna d´Octavio Tapiella). ALLA, Uviéu, 1995.

Argumentu; Los animales de cá Manor viven trabayando ensin descansu y baxo los abusos de Jones, el dueñu de la granxa. Un día'l vieyu gochu Mayor fala-yos de la necesidá de facer una revolución y echar a Jones, poco dempués Mayor muerre y los animales de la granxa entamen una revolución de la que salen victoriosos y escriben les sos regles sobre una paré. Nun primer momentu la granxa funciona meyor que con Jones y tol mundu trabaya pa sacar alantre Cá los animales. Pero los gochos, que s´autoproclamaran llíderes por ser los animales más llistos, entaman a abusar del so poder y de la so intelixencia sobre´l restu d´animales.

Nesti llibru Orwell fai una critica del estáu totalitariu y de los abusos de poder a traviés d´una fábula . L´argumentu ye una metáfora de la Revolución Rusa; el primer llíder foi Lenin (el gochu Mayor) que quería que tolos ciudadanos tuvieren los mesmos drechos, cuando Lenin muerre Stalin (el gochu Napoleón) y Trotsky (Trapuñeve) lluchen pol poder, gana Stalin y conviértese nun gobernante sanguinariu, amás tolos animales de la granxa representes estremaes clases sociales; les oveyes analfabetes representen a los llabradores, el caballu, un trabayador incansable, ye´l proletariáu, los perros violentos que protexen a Napoleón ye l´exércitu, la pega Moses ye la ilesia, falando siempre d´un cielu d´animales… El llibru ye xunto “1984” una de les obres cimeres de George Orwell y pel momentu la única obra del autor que podemos lleer na nuesa llingua, dende equí un glayíu perfuerte pa que daquién entame la torna de “1984” a l´asturianu. La obra foi asoleyada pola academia en 1995 y la torna d´Octavio Tapiella foi la obra ganadora del concursu de torna del añu 94.

“Y alcordaivos, collacios, qu´enxamás tenéis de duldar d´esto. Que nenguna cosa vos puea facer dexalo. Nun faigáis casu cuando vos cunten que l´home y los animales tienen los mesmos intereses, y que lo que ye bono pa ún, yelo pa los otros. ¡Ye una fula!. L´home nun trabaya pa naide a nun ser pa elli mesmu. Y ente tolos animales tendrá d´haber una unidá perfecha y un perfeutu compañerismu na llucha. Tolos homes son enemigos y tolos animales collacios” (Mayor, el gochu ideólogu de la revolución)

Por: eL trAsgU d´aRecEs | N´ast | Comentarios (0) | Referencias (0)