eL trAsgU d´aRecEs

Martes, 10 de octubre de 2006

LA VERDÁ MATÓ A ANNA POLITKÓVSKAYA

La periodista rusa Anna Politkóvskaya ñació en Nueva York en 1958. Ye autora d´artículos y llibros tornaos a munchos idiomes y entamó a trabayar como periodista nel añu 1983 na revista “Izvestia” anque anguaño escribía pa “Novaya Gazeta”, la publicación más crítica col Kremlin. Saltó a la fama internacional al ser seleicionada como mediadora pol comandu chechenu qu´ocupó´l teatru Dubrovka de Moscú con más de 800 espectadores, anque la operación de “rescate” de los servicios de seguridá rusos finó con 169 muertos. Dos años dempués foi envenenada demientres diba n´avión a Beslán, posiblemente tamién pa mediar nel secuestru de la escuela que finó tamién en masacre. Nos sos llibros la periodista criticaba la política de Putin en Chechenia y la violación de drechos humanos por parte del exércitu rusu sobre la población chechena col consentimientu del gobiernu, tamién acusaba´l gobiernu rusu de permitir que les mafies controlaran el país, les sos crítiques provocaron que recibiera amenaces de muerte de los servicios secretos de la prieta democracia rusa. Anguaño Politkóvskaya taba trabayando nún artículu sobre les tortures en Chechenia, pero yá nun podrá asoleyar esti artículu porque´l pasáu sábadu foi atopada na so casa con cuatro bales nel so cuerpu. La muerte de la periodista súmase a una llarga llista de 300 periodistes desaparecíos o asesinaos en Rusia dende 1991 (dende que Putin llego al poder nel 2000 foron 12 los periodistes con asesinatos ensin resolver). El periodismu de verdá, el que nun ta manipulao por grandes grupos mediáticos nin pol poder, molesta muncho, tantu que son capaces de cualesquier cosa con tal de facelo callar.

Por: eL trAsgU d´aRecEs | Mundu | Comentarios (0) | Referencias (0)