eL trAsgU d´aRecEs

Lunes, 30 de octubre de 2006

FORMIENTU PA UNA LLINGUA

El pasáu sábadu presentóse en Xixón nel marcu de L´Arribada 2006 la nueva revista Formientu, na que 25 escritores menores de 30 años amuesen que la lliteratura n´asturianu tien asegurada la so continuidá por unos cuantos años, amás les páxines de la revista cunten con escritores de tou´l dominiu llingüísticu ástur; un lliones y un estremeñu. Los testos tán acompañaos de dibuxos y semeyes de cuatro artistes gráficos que tampoco lleguen a la trentena. El qu´escribaya estes llinies tien l´arguyu de participar en Formientu, anque nun toi mui contentu del mio relatu, ún dexóse demasiáu guiar poles emociones demientres escribía y díes dempués de mandalu pala so publicación nuna rellectura dime cunta que yera lo peor de lo poco que tengo asoleyáu. Espero que si mercáis la revista vos preste´l mio relatu (pero nun xuzguéis el mio “valir” lliterariu por esi artículu, h.e, he).

Como nun podía ser d´otru xeitu nún país como Asturies los medios de comunicación nun dixeron una sola pallabra sobre “Formientu”. Los informativos de Tele Tini prefirieron falar na so seición de “sociedá y cultura” d´una seta de diez quilos topada en Granada que d´una revista qu´amuesa que la llingua propia del país nel qu´emite (anque nun emita un res nesa llingua) tien futuru. Quiciabes los responsables de la TPA camienten que nun ye precisamente una bona noticia. Nos medios escritos nin una sola pallabra.

Los responsables de la revista cunten con sacar dos o tres númberos añalmente. Pel momentu paez qu´hai futuru, hai formientu pa unos cuantos años.

Por: eL trAsgU d´aRecEs | Lliteratura | Comentarios (0) | Referencias (0)