eL trAsgU d´aRecEs

Martes, 31 de octubre de 2006

ESTA NUECHE YE´L SAMAIN…

… la nueche de fin d´añu de los celtes, la so fiesta más importante, el momentu onde´l mundu de los muertos y el de los vivos s´axuntaben a traviés d´una “puerta” que namás quedaba abierta esta nueche demientres unes hores. Nesti día los vieyos pobladores d´esta tierra dexaben una pequeña parte de la collecha delantre de les sos cases pa mantener a los sos antiguos, qu´esta nueche diben visitalos, contentos. Güei l´añu dixébrase en dos metaes; la de la vida y la de la muerte. Finaba´l tiempu del calor y la lluz, el tiempu de la mocedá y la vida, y llegaben los meses fríos y escuros de la muerte, onde los protagonistes yeren los vieyos. Yera la época de sentase delantre del fueu del llar y escuchar los cuentos y hestories que los mayores tresmitíen a los mozos de xeneración en xeneración. Un tiempu que finaba l´ún de Mayu, cuarenta díes enantes del solsticiu de branu, de la máxica nueche de San Xuan, cuando´l dios del sol, Belenos, recuperaba´l so poder.

Esta nueche los celtes nun podíen dexar el so pueblu y rellacionase con otros poblaos, namás que podíen tar colos sos antepasaos y a vegaes yeren capaces d´entrar nel mundu de los muertos. En tol pobláu prendíense fogueres pa guiar a los muertos haza los sos familiares ente la escura nueche y qu´amás calecieren nel fogar familiar. Pero los ritos entamaben muncho tiempu enantes coles matances d´animales, pero nun yera namás qu´un ritu relixosu; entamaba l´iviernu, había que guardar carne y piel pa les époques de fríu y ñeve.

Dempués de la conquista romana´l cristianismu tresformo la festividá nel día de tolos santos, d´onde deriva´l nome d'Halloween, p´alcordase de los familiares que yá nun taben y rezar por ellos. La fiesta foi espardiéndose per tola cristiandá hasta que´l papa Sistu IV fízola obligatoria. Muncho tiempu dempués los irlandeses que colonizaron el nuevu mundu llevaron ellí les sos creencies, ente elles l'All-hallow even (enantes de tolos santos). Anguaño gracies a la estandarización cultural global, al cine d'Hollywood y la incomparable collaboración de los medios de comunicación qu´acepten esta fecha como asentada na nuesa sociedá, n´Asturies hai xente que celebra´l Halloween y nin siquiera saben que munchos sieglos enantes que se descubriera´l continente americanu nesta tierra yá yera un día perespecial y de gayola, el día onde´l mundu de los vivos y el de los muertos quedaba xuníu; el Samain, l´entamu de los seyes meses de la muerte.

Por: eL trAsgU d´aRecEs | Caxigalines | Comentarios (0) | Referencias (0)