eL trAsgU d´aRecEs

Viernes, 10 de noviembre de 2006

La Xunta contesta a Javier Fernández

Les declaraciones feches el sábadu 4 de payares pasáu pol secretariu xeneral de la Federación Socialista Asturiana, Javier Fernández, sobre la llingua asturiana y el so futuru, suponen un pasu más na escapada de los dirixentes socialistes asturianos hacia les postures más acérrimes y centralistes en cuantes a la cuestión llingüística.
Nun s’entiende que’l cabezaleru máximu del partíu socialista n’Asturies rellacione defensa de la llingua y oficialidá con «nacionalismu» y «imposición» y qu’esi mesmu partíu defenda la oficialidá nos demás territorios billingües del estáu. Nun intentu de dividir a la sociedá asturiano, vuelve cola identificación ente defensa de la oficialidá y el nacionalismu, cuando’l nacionalismu (español o asturianu) nun tien gota que ver col amor y la defensa consciente de la llingua d’ún.
Con esa vieya y falsa contraposición ente la «protección» qu’ellos defenden y la «oficialidá» que defendemos otros, busca distraer l’atención y engañar a la xente.
Tamos seguros de que’l Sr. Fernández tien que saber de sobra que nun ye posible garantizar la sobrevivencia d’una llingua na nuesa sociedá si nun tien validez xurídica y s’iguala en derechos a les otres llingües oficiales. Sábelo bien porque los sos compañeros de partíu n’otres comunidaes defenden la oficialidá de les sos llingües autóctones. Sábelo bien porque tolos especialistes y organismos oficiales defenden la igualdá xurídica como elementu imprescindible en cualquier política de recuperación llingüística. Si tanto diz querer la llingua asturiana, ¿cómo pue dexar que’l so usu siga siendo illegal y ensin validez xurídica? ¿Piensa que va recuperase una llingua con hora y media a la selmana de clas o con unos minutos na radio y na televisión públiques? En nengún sitiu del estáu se tán aplicando eses polítiques de paños calientes. Lo que s’aplica ye la oficialidá y polítiques clares de normalización llingüística.
¿Fadrá falta recorda-y que nun va un añu que’l grupu parllamentariu socialista nel Congresu presentó una proposición non de llei onde se destaca (y citamos testualmente pa vergüenza del Sr. Fernández): «la protección e impulso de las lenguas propias de las diferentes Comunidades Autónomas en las que rige un régimen de cooficialidad lingüística no sólo no se ha producido en menoscabo de la lengua común, sino que ha generado una dinámica de convivencia lingüística que es la característica principal de la vida cotidiana en nuestros pueblos y ciudades (...) Los ciudadanos tienen derecho a usar, de acuerdo con su libre elección y con plena validez jurídica, cualquiera de las lenguas oficiales en todos los ámbitos y tipo de realción».
Nun se pue dicir de manera más clara lo que significa la oficialidá. Pero paez qu’eso namás val pal restu del mundu nun siendo Asturies. Equí somos diferentes pa los dirixentes socialistes asturianos.
El problema de la FSA ye que la so situación ye incómoda. Tán faciendo de menos a los asturianos y asturianes al nun considerar la so llingua al mesmu nivel que les demás. Tán defendiendo esactamente lo contrario que defenden n’otres comunidaes y eso la xente sábelo. Tán negando derechos a una parte importante de la población d’Asturies cuando’l so partíu quier abanderar a nivel estatal precisamente l’aumentu de derechos pa toles minoríes y non el recorte.
Por favor, cambien de cantar, porque por muncho qu’anecien cola mesma música sigue siendo igual de machacono y pasao de moda. Axúntense con esa mayoría d’asturianos y asturianes que ven con normalidá la oficialidá porque nun-yos paez presentable que se discrimine a naide por falar la llingua d’equí y más cuando n’otres comunidaes vecines va décades que la oficialidá de les sos llingües ta reconocida.

Por: eL trAsgU d´aRecEs | Opinión | Comentarios (0) | Referencias (0)