eL trAsgU d´aRecEs

Martes, 21 de noviembre de 2006

SKAMA LA REDE YÁ TIEN FECHA PA LA GRABACIÓN DEL SO NUEVU DISCU

El grupu de rock ástur Skama la Rede ta yá preparando´l que será´l so segundu discu, el grupu tien pensáu entamar cola grabación na segunda quincena de febreru. La grabación va facese, como ye vezu en toles producciones de L´Aguañaz, nos estudios Tutu de Corvera baxo la producción de Sergio Rodríguez.

El discu, que tovía nun tien títulu, va cuntar con doce cantares nuevos y “musical y temáticamente'l CD va siguir les pautes de "La Nuesa Hestoria", anque cola evolución natural qu'hai nestos casos” según afiten los componentes del grupu del cabu Peñes. Nel que va ser el segundu CD del grupu vamos poder escuchar ska con pingarates de punk, rock and roll, reagge y otros estilos que s´amestaren a lletres qu´analizaran la realidá asturiana, unes con humor y otres con seriedá. El nuevu discu d´una de les revelaciones musicales del 2005 na música asturiana, tantu de crítica como de públicu, pue que tea nes tiendes pa la primavera. Hasta´l momentu podemos da-y un repasu a “La Nuesa Hestoria”, déxovos equí un cantar del grupu que foi escoyíu polos llectores d´Asturies.com como´l meyor n´asturianu del 2005.

INTERNACIONALISTA
(Lletra: David Artime “Roxu”. Música: Skama La Rede)

Pela cai Uría vese venir
una gran marea humana
caleyando al ritmu que marca
una gaita asturiana.

Mil banderes de mil collores
ondeen al son del vientu nordés.
Milenta races de mil naciones
chumen culinos delantre’l Corte Inglés.

Ten cuidáu con esi fedayín
que sólo fuma roxu llibanés.
Nun-y deas ficha y fala con fidel
que de xuru que lleva papel.

Mira a esi kurdu escanciando un culín
con una camiseta d’Hô Chi Minh.
Los Sin Tierra dancen una capoeira
y Silvio Rodríguez toca na Escandalera.

Y un cartelu anuncia
a la entrada l’autopista:
"Güei Uviéu ye capital
internacionalista".

Ten cuidáu con esi castellels
que ta xubiendo a la catedral.
Arriba’l tou escolinga una pancarta:
"L’Asturianu llingua oficial".

Mira l’aurreskolari danzando un saltón
y a Labordeta faciendo botellón.
Corderu a la estaca asen los comuneros
y “Aida La Fuente” entonen los xornaleros.

Y milenta puños llevanten
el mástil d’una asturina.
D’Uviéu a Bagdag trema l’imperialismu.
Cuba, Irlanda, Palestina.

Y glayíos de lliberación
resuenen con gallardía.
España entera frayada en mil cachinos.
Asturies, Euskadi, Andalucía.

Y un cartelu anuncia
a la entrada l’autopista:
"Güei Uviéu ye capital
internacionalista".

Por: eL trAsgU d´aRecEs | Música | Comentarios (0) | Referencias (0)