eL trAsgU d´aRecEs

Sábado, 25 de noviembre de 2006

DELLES COSES

Ensin dulda esti home foi lo más "mediáticu" de tola mani

Dos nueves páxines forman parte yá de la comunidá d´asturblogs; per un llau “Rapiega”(que fai´l blog númberu 70 na nuesa llingua) onde´l so autor espón los sos pruyimientos sobre Asturies pero tamién sobre´l restu del mundu, amás na páxina hai enllaces a otros 26 blogs n´asturianu. Y el segundu ye “FSA_de_las_JONS”, un prestoso blog que parodia´l partíu y el gobiernu que tanto fai por Asturies (y el so desaniciu).

El tema del que más se ta falando nos asturblogs estos díes ye la manifestación que percorrió´l pasáu sábadu les cais d´Uviéu, ensin dulda que 15.000 persones esixan un drechu humanu nun ye pa menos, tovía más si los medios de comunicación “pasen” del tema. Nun ye casual que nes informaciones que los periódicos asturianos ufierten de la clásica manifestación de tolos años del día de les lletres siempre incluya nel títulu´l númberu de manifestantes, preferible´l númberu que da la policía llocal d´Uviéu que´l de la organización que convoca. Lo normal d´esta manifestación añal suel ser ente 5.000 y 7.000 persones (3.000 y 4.000 según la policía). Ensin embargu na mani del sábadu que pidía la oficialidá nuna reforma del estatutu que se supón inmediata y na que participaron 15.000 persones (10.000 según la policía) TOLOS periódicos asturianos titularon el domingu con “Miles de manifestantes…” (en “El Comercio” la cifra de manifestantes baxaba a 6.000 según la policía y 10.000 según el CAO). Paez qu´un titular qu'incluya oficialidá y un númberu con más cuatro cifres nun tien cabida nún periódico asturianu. Nin que falar yá de TPAs o televisiones estatales. Un debate sobre´l tema fechu con seriedá –con especialistas, non con “Amigos de los Bables”- sobre un tema que lleva 30 años na cai y convoca a 15.000 manifestantes tendría de facese nuna televisión si fora de verdá plural y amosara la realidá d´Asturies como diz Migoya. Per otru llau 15.000 persones nuna comunidá como Asturies seríen guapamente unes 80.000 persones nuna comunidá como Catalunya o Madrid, con dalgo asina de xuru que toles televisiones estatales abriríen los sos informativos. Pero paez que 15.000 persones, y más si son asturianos, nun cuenten nada.

Por: eL trAsgU d´aRecEs | Opinión | Comentarios (0) | Referencias (0)