eL trAsgU d´aRecEs

Sábado, 25 de noviembre de 2006

MEDIOS PUBLICOS Y L´ENFOTU DE NORMALIZAR L´ASTURIANU

Yá faláramos equí enantes del entamu de les emisiones de la RPA de los primeros programes que diben tresmitir na nuesa llingua. Paez qu´anque l´asturianu nun esista pa la TV na radio si va haber una presencia del idioma que pel momentu paez esperanzadora. Bien ye verdá que les ráfages col nome de la emisora namás que son emities en castellán y que los informativos qu´emiten cada media hora (namás que cuando nun hai programación y radien música presentada en castellán por un redactor de la emisora) son dafechu en castellán, pero paez qu´hai enfotu, pel momentu la mayoría de programes en emisión son na nuesa llingua. Agora ye d´esperar que nes próximes selmanes y nos próximos meses, demientres estrenen más programes, la programación n´asturianu vaya medrando (visto´l casu de Tele Tini tengo llerza a que namás quede no qu´hai, entós la presencia del idioma sería namás que simbólica). Pel momentu cuasi tolos díes podemos escuchar hora y media de programación n´asturianu d´una emisión total d´unes tres hores. Nel restu de programación músical qu´hai a lo llargo del día la nuesa música tien l´espaciu que merez, ta ehí y pue dir un cantar de “Llan de Cubel” ente ún d´U2 y otru del “El canto del Loco”, ensin guetos. Na RPA paez que van pol bon camín, facer una radio de calidá, con una presencia perimportante de la cultura y onde la nuesa llingua tenga programes de toa triba con un enfotu normalizador, esperemos que dientro poco seya una rialidá y escuchemos informativos, magazines diarios, trasmisiones deportives o alderiques políticos na nuesa llingua.
De la TPA yá nun apetez nin falar. Una llacedia y el pueblu asturianu paez tar dafechu d´alcuerdu conmigo; Tele Tini nun algama nin un 2 % d´audiencia y amás ye superada n´audiencia pola TV murciana que ta emitiendo en prebes, carta d´axuste suponemos. Ensin embargu cuando xuega´l Sporting la TPA llega a ser llider d´audiencia nel país. Ye dicir que los asturianos tienen sintonizada la TPA, saben la so programación pero namás la ven si-y ufierten daqué d´interes que nun s´emita n´otra televisión. Si una televisión llogra ser llider un día a la selmana y el restu de díes ye la televisión menos vista del estáu ye que la programación y el plantegamientu de contenidos del canal nun interesen un res a la población a la que ta dirixida. Los responsables tovía tán a tiempu de camudar d´arriba a abaxo la TPA y facer una televisión dirixida´l públicu asturianu, un públicu qu´anguaño da-y dafechu la espalda.

Los programes n´asturianu de la RPA son de 15.00 a 16.00 (menos los vienres) y yá falaramos d´ellos equí. La segunda franxa de programación na nuesa llingua ye de 22.30 a 23.00 de llunes a vienres y estos son los contenios;

- Llunes: Nomes d´Asturies, programa del escritor Chechu García que fai un repás pela memoria de los asturianos a traviés de los fechos o los personaxes más relevantes na hestoria del país. Un exemplu de lo muncho que podía servir el doblaxe de series, dibuxos y películes a l´asturianu pa dar trabayu. El programa ye una mezclienda de documental y ficción que cuenta los grandes fechos de la hestoria asturiana.

- Martes: El mirador d’Urdiales, conducido por el biólogo Bertu Ordiales, tien como tema principal la ñaturaleza autóctona d´Asturies. El programa fai selmanalmente un reportaxe sobre un tema ecolóxicu y cunta cola aportación d´estudiosos y conocedores de la materia.

- Miércoles: Revoltixu mitolóxicu, ye un espaciu divulgativu dirixíu por Mari Lluz Pontón col que, a traviés de cuentos, monólogos y entrevistes, treslladase a los oyentes la cultura asturiana.

- Xueves: Canta l’uxu, un programa dedicáu al folclore y les tradiciones asturianes. Inclúi testimonios orales y sonios orixinales sobre la identidá y la cultura d´Asturies, recoyíos pol so autor, Xosé Ambás, a lo llargo de más de diez años d´investigación. Pa nun perdéselo.

- Vienres: Paraisu natural, espaciu d´actualidá social y cultural que fala, de la mano de la filóloga Consuelo Vega, la rialidá del mundu dende Asturies.

Por: eL trAsgU d´aRecEs | TeleTini | Comentarios (1) | Referencias (0)