eL trAsgU d´aRecEs

Sábado, 23 de diciembre de 2006

CAMPAÑA POLA RECEPCIÓN DE LOS CANALES PORTUGUESES EN GALIZA

Los blogs gallegos Nem tele nem gaitas y Galego de seu tán entamando una campaña pa pidir que la compañía de cable R (la versión gallega de Telecable) incluya na so ufierta´l nuevu canal internacional portugués CLP TV. Los blogs camienten qu´esta midida serviría pa mantener en conexón les cultures gallega y portuguesa, con una fala perasemeyada, y proponen una campaña de peticiones por corréu ellectrónicu. Dende va años dellos grupos soliciten que les televisiones portugueses puedan ser sintonizaes en Galiza de forma analoxica, sobremanera los grupos reintegracionistes (aquellos que refuguen la normativa de la RAG y proponen una basada na normativa portuguesa pa reintegrar el gallegu na comunidá lusófona). Esta vindicación faenla amparándose na Carta Europea de les llingües minoritaries roblada pol gobiernu español nel añu 1992 que nel artículu 11.b diz lliteralmente que "Les partes comprométense a garantizar a llibertá de recepción direuta de les emisiones de radio y televisión de los países vecinos nuna llingua falada del mesmu xeitu o asemeyáu a una llingua rexonal o minoritaria, y a nun oponese a la tresmisión d´emisiones de radio y de televisión de los paises vecinos nesa llingua. Amás, comprometense a velar pa que nun se remane denguna restrinción a la llibertá d´espresión y a la llibre circulación d´información nuna llingua falada del mesmu xeitu o asemeyáu a una llingua rexonal o minoritaria...". La midida ye sofitada de forma sele pola Conseyera de Cultura gallega, del BNG (namás que dixo tar d´alcuerdu cola iniciativa nuna entrevista).

Amparándonos nesti artículu de la Carta Europea de les llingües minoritaries de cuntar con unos bonos políticos preocupaos pola nuesa realidá llingüística a lo llargo de tol dominiu llingüísticu asturllionés, podríen algamase convenios ente´l Principáu y les diputaciones del País llionés pa que los llionesés pudieren recibir la señal de la RTPA, pero tamién ye verdá que pa eso la RTPA tendría que ser un mediu billingüe polo menos al 50 %. Pero ye nidiu que falta munchu pa que Tele Tini seya un mediu con un mínimu d´enfotu pa cola llingua y más nidiu ta tovía que les instituciones asturianes y llioneses tán remanaes por partios del más ranciu españolismu perinteresaos en que la comunidá llingüística asturllionesa tea lo más dixebrada posible.

Por: eL trAsgU d´aRecEs | Otros pueblos, mesma llucha | Comentarios (1) | Referencias (0)