eL trAsgU d´aRecEs

Martes, 26 de diciembre de 2006

Voces nueves pa un vieyu cantar

Xunta Moza cumple diez años na xera de protexer y promover la llingua Un centenar y mediu de persones pasaron per esi coleutivu cultural dende 1996

FRANCISCO ÁLVAREZ/XIXÓN
El llustru caberu del sieglu y del mileniu enseñaba les oreyes enllenu d'incertidume pa una llingua enferma por desnutrición, sigún el diagnósticu de la Unesco, y la idea de crear un coleutivu pa dir picando cantera ente la mocedá na defensa de la llingua convocó a un grupín de moces y moces de Xixón. Asina nació, va diez años, Xunta Moza

Lluismi Orviz, qu'entós tenía 22 años, exerció nos primeros tiempos el cargu de coordinador «por formalismu, porque funcionamos dende'l primer día d'un mou asambleariu. Entamamos fuerte en Xixón con una quincena de persones y al pocu tiempu empezamos a trabayar n'Uviéu con cuatro o cinco militantes».

Lluismi, que yá sumaba dellos años de pertenencia a la Xunta pola Defensa de la Llingua Asturiana, dexa claro que «un coleutivu nun nació como les mocedaes del otru. Agora sí pue considerase asina, pero de mano nun había vinculación orgánica ente elles y, de fechu, Xunta Moza tien estatutos propios. Ún de los nuestros oxetivos yera sentar les bases pa dar un relevu xeneracional al movimientu de reivindicación llingüística, pero non solo na Xunta pola Defensa de la Llingua».

Ente les primeres actuaciones públiques, recuerda, hubo «pasacais y acciones reivindicatives, siempre con sentíu del humor. Diben más bien dirixíes a danos a conocer pa crecer. Depués desarrollamos campañes complementaries de les de la Xunta pola Defensa de la Llingua».

En cuantes a les reivindicaciones fundacionales de Xunta Moza, cuida que «siguen d'actualidá, porque derechos como la oficialidá nun tán reconocíos. L'usu de la llingua va baxando, pesie a qu'hai un avance cualitativu y cuantitativu de sofitu social, prestixu del idioma y concienciación. L'oxetivu de dar esi relevu xeneracional creo que lu cumplimos de sobra. Munches de les persones que tán agora na primer llinia de la reivindicación entamaron en Xunta Moza. Foi una cantera importante pal movimientu llingüísticu».

Del colexu a la Universidá
Merche González Surga entró con 19 años a trabayar na estaya d'Avilés, onde'l biltu de l'asociación foi «un cursín d'asturianu. Cuatro o cinco de los participantes vimos depués la posibilidá de lluchar un pocoñín pola reconocencia de la llingua. Tuvimos un grupu organizáu demientres cuatro años, más o menos, enantes de que la xente marchare fuera d'Asturies a trabayar: ún ta viviendo en Noruega, otra en Turquía...». Añade que «de lo que tamos más arguyosos foi de trabayar colos neños y rapacinos nos concursos lliterarios pa escolinos d'Avilés y comarca».

Tamién con 19 años, Penélope Miranda formó parte de la primer fornada de Xunta Moza n'Uviéu, integrada por «estudiantes universitarios a los que depués se sumaron otros d'enseñances medies». Entró en contautu cola asociación na acampada pola oficialidá que tuvo llugar nel campu San Francisco na seronda de 1997. Llamenta que d'entós p'acá «l'avance sociopolíticu foi escasu».

Ricardo González, ún de los militantes d'anguaño, resalta qu'ente les nueves misiones de Xunta Moza ta la de trabayar pola presencia de la llingua na Universidá, organizar actividaes de convivencia y aire llibre como Acampallingua o face-y compañía a la popular Pita «nos actos públicos del presidente Areces, cola repercusión mediática conocida por toos». Nuevos tiempos pa un vieyu cantar.

EL COMERCIO (26/12/2006)

Por: eL trAsgU d´aRecEs | Llucha | Comentarios (0) | Referencias (0)